सांगली टुडे वृत्तसेवा: सांगली: उद्या मंगळवारी (दि. २० ऑक्टोबर २०२६) जिल्ह्यात दसरा सण मोठ्या उत्साहात साजरा होत असून दुर्गामाता मूर्ती विसर्जनाच्या मिरवणुका निघणार आहेत. मात्र, कृष्णा नदीतील पाण्याची घटलेली पातळी, संभाव्य प्रदूषण आणि कायदा-सुव्यवस्थेच्या कारणास्तव सांगलीचे पोलीस अधीक्षक तुषार दोशी यांनी संपूर्ण जिल्ह्यात १९ ऑक्टोबरच्या मध्यरात्रीपासून ते २५ ऑक्टोबर रोजी रात्री १० वाजेपर्यंत कडक मनाई आदेश जारी केले आहेत. या आदेशाचे उल्लंघन करणाऱ्यांवर कडक कायदेशीर कारवाई करण्यात येणार असल्याचा इशारा देण्यात आला आहे.
कृष्णा नदीत पाणी कमी; विटंबना टाळण्यासाठी निर्णय
सध्या सांगली जिल्ह्यात दुष्काळी परिस्थिती असून कृष्णा नदीपात्रात पाण्याची पातळी अत्यंत कमी झाली आहे. नदीत पाणी कमी असल्याने दुर्गामातेच्या मूर्ती पूर्णपणे पाण्यात विसर्जित न होता त्यांची विटंबना होण्याची शक्यता आहे.
कायदा व सुव्यवस्थेचा प्रश्न निर्माण होऊ नये आणि पाण्याचे प्रदूषण टाळता यावे, यासाठी महाराष्ट्र पोलीस अधिनियम १९५१ च्या कलम ३३(१)(एम) अन्वये हे प्रतिबंधात्मक आदेश जारी करण्यात आले आहेत.
प्रशासनाचे महत्त्वाचे नियम व आवाहन:
- मिरज गणेश तलावातच विसर्जन: दि. १५ ऑक्टोबर रोजी जिल्हाधिकाऱ्यांच्या उपस्थितीत झालेल्या नवरात्र मंडळ पदाधिकाऱ्यांच्या बैठकीतील निर्णयानुसार, सांगली महापालिका क्षेत्रातील सर्व नवरात्र मंडळांनी मूर्ती विसर्जन हे मिरज येथील गणेश तलावातच करायचे आहे.
- मूर्ती सुरक्षित ठेवण्याचे आवाहन: मंडळांनी शक्य असल्यास पाण्याच्या तुटवड्यामुळे मूर्ती विसर्जित न करता ती सुरक्षित जागेवर जतन करावी, असेही आवाहन प्रशासनाने केले आहे.
- पाण्याचे स्रोत दूषित करण्यास बंदी: पिण्याच्या पाण्याचे स्रोत, विहिरी किंवा नदीपात्रातील पाणी दूषित होईल अशा कोणत्याही कृतीस पूर्णपणे मनाई करण्यात आली आहे.
- उल्लंघन केल्यास गुन्हा दाखल: या आदेशाचा भंग करणाऱ्यांविरोधात महाराष्ट्र पोलीस कायदा १९५१ च्या कलम १३१ नुसार गुन्हा दाखल करून कायदेशीर कारवाई करण्यात येईल, असा स्पष्ट इशारा पोलीस प्रशासनाने दिला आहे.
🔴 लेटेस्ट
सांगली जिल्ह्यातील प्रशासकीय आदेश, स्थानिक सण-उत्सव आणि महत्त्वाच्या घडामोडींचे ताजे अपडेट्स मिळवण्यासाठी आमचा ‘सांगली टुडे’ व्हॉट्सॲप चॅनेल नक्की फॉलो करा. 👉 फॉलो करा.
More Read
