सांगली: शेतकऱ्यांसाठी मोठी बातमी! २२ ऑक्टोबरपासून मोबाईलवरून खत बुकिंग सुरू; FFS प्रणालीबाबत जिल्हाधिकाऱ्यांचे महत्त्वाचे आवाहन

सांगली टुडे वृत्तसेवा: सांगली: रासायनिक खतांची खरेदी अधिक पारदर्शक, सुलभ आणि जलद गतीने व्हावी यासाठी कृषी विभागामार्फत विकसित करण्यात आलेली ‘फ्रेमवर्क फॉर फर्टिलायझर सेल’ (Framework for Fertilizer Sale – FFS) ही मोबाईल प्रणाली आता सांगली जिल्ह्यात लागू होत आहे. जिल्ह्यात येत्या गुरूवारपासून (२२ ऑक्टोबर २०२६) या प्रणालीद्वारे प्रत्यक्ष खत विक्री केली जाणार असून, जिल्ह्यातील सर्व शेतकऱ्यांनी या नवीन ‘FFS’ प्रणालीचा वापर करूनच खत खरेदी करावी, असे आवाहन जिल्हाधिकारी डॉ. मैनाक घोष यांनी केले आहे.

Contents

खत खरेदीसाठी रांगेत उभे राहण्याची गरज नाही
ॲपचे नाव काय आणि कुठून डाउनलोड करायचे?
मोबाईलवरून खत बुकिंग कसे होणार?
कृषी केंद्रांना कडक सूचना व शेतकऱ्यांसाठी मदत कक्ष

खत खरेदीसाठी रांगेत उभे राहण्याची गरज नाही

सध्या कृषी सेवा केंद्रांवर ई-पॉस (ePOS) मशीनद्वारे खतांची विक्री केली जाते. मात्र, दुकानांवर होणारी गर्दी टाळण्यासाठी, शेतकऱ्यांचा वेळ वाचवण्यासाठी आणि खत विक्री प्रक्रियेत पारदर्शकता आणण्यासाठी शासनाने हे FFS मोबाईल ॲप उपलब्ध करून दिले आहे. या प्रणालीमुळे शेतकऱ्यांना घरात बसून मोबाईलवरच पिकांच्या गरजेनुसार खतांची माहिती आणि संबंधित कृषी केंद्रावर उपलब्ध असलेला प्रत्यक्ष खतसाठा तपासता येणार आहे.

ॲपचे नाव काय आणि कुठून डाउनलोड करायचे?

ॲपचे नाव: Framework for Fertilizer Sale (FFS)
डाऊनलोड कसे करावे? हे ॲप अँड्रॉइड मोबाईलसाठी Google Play Store वर उपलब्ध आहे. शेतकऱ्यांनी प्ले स्टोअरवर जाऊन “Framework for Fertilizer Sale” किंवा “FFS App” असे शोधून कृषी विभागाचे अधिकृत ॲप डाऊनलोड करावे.

Framework for Fertilizer Sale App डाउनलोड करा.

मोबाईलवरून खत बुकिंग कसे होणार?

जमीन व पिकांची निवड: शेतकऱ्यांनी ॲपमध्ये आपल्या जमिनीचे क्षेत्रफळ आणि पिकांची निवड केल्यानंतर पिकासाठी आवश्यक असलेल्या खतांची सामान्य शिफारस (General Fertilizer Recommendation) स्क्रीनवर दिसेल.
विक्रेत्याची निवड: गरजेनुसार आवश्यक खतांचा प्रकार व प्रमाण निवडून शेतकरी आपल्या जवळच्या अधिकृत खत विक्रेत्याची (कृषी केंद्र) निवड करू शकतील.
टोकन व क्यूआर कोड: बुकिंग सबमिट करताच शेतकऱ्याच्या मोबाईलवर एक युनिक क्यूआर कोड आणि टोकन क्रमांक प्राप्त होईल.
खत खरेदी: हा टोकन क्रमांक किंवा क्यूआर कोड संबंधित खत विक्रेत्याला दाखवून शेतकरी वेळेची बचत करत आपले खत खरेदी करू शकतील.

कृषी केंद्रांना कडक सूचना व शेतकऱ्यांसाठी मदत कक्ष

जिल्ह्यातील सर्व अधिकृत खत विक्रेत्यांनी आपली ई-पॉस (ePOS) मशीन नेहमी सुरू ठेवावी, प्रत्यक्ष दुकानातील खतसाठा आणि ई-पॉस मशीनवरील साठा यात तंतोतंत ताळमेळ ठेवावा, अशा सक्त सूचना प्रशासनाने दिल्या आहेत.

ॲप वापरताना किंवा खत खरेदी करताना शेतकऱ्यांना काही तांत्रिक अडचण आल्यास त्यांनी तालुकानिहाय नेमलेल्या तालुका कृषी अधिकारी कार्यालयातील गुण नियंत्रण निरीक्षक किंवा पंचायत समिती कार्यालयातील गुण नियंत्रण निरीक्षकांशी संपर्क साधावा, असे आवाहन जिल्हाधिकारी डॉ. मैनाक घोष यांनी केले आहे.

हे ही वाचा: Govt Schemes: महाराष्ट्रातील ७ सरकारी योजना बंद; पाहा कोण-कोणत्या योजनांचा समावेश.

सांगली जिल्ह्यातील शेती विषयक योजना, खत-बियाणे दर आणि कृषी विभागाचे अधिकृत सल्ले मोबाईलवर मिळवण्यासाठी आमचा ‘सांगली टुडे’ व्हॉट्सॲप चॅनेल नक्की फॉलो करा. 👉 फॉलो करा.

वाचा: Silai Machine Yojana: शिलाई मशीनसाठी ९०% सबसिडी? अर्ज करण्यापूर्वी पाहा कोणाला मिळणार लाभ!.