सांगली (सांगली टुडे न्यूज नेटवर्क): दिवाळीच्या तोंडावर राज्य शासनाने राज्यातील अंगणवाडी सेविका आणि मदतनीस यांच्यासाठी अत्यंत मोठा आणि दिलासादायक निर्णय घेतला आहे. शासनाकडून यंदाच्या दिवाळीत अंगणवाडी सेविका व मदतनीसांना ‘भाऊबीज भेट’ म्हणून प्रत्येकी २,००० रुपये देण्याचा निर्णय घेण्यात आला आहे. महिला व बालविकास मंत्री आदिती तटकरे यांनी मंत्रिमंडळ बैठकीनंतर ही अधिकृत माहिती दिली.
या निर्णयामुळे राज्यातील लाखो अंगणवाडी कर्मचाऱ्यांची दिवाळी गोड होणार असून, यासाठी शासनाने तब्बल ४२ कोटी ८१ लाख ९४ हजार रुपयांच्या निधीची तरतूद केली आहे.
२ लाखांहून अधिक कर्मचाऱ्यांना लाभ
राज्यातील एकात्मिक बालविकास सेवा योजनेअंतर्गत (ICDS) गावागावात आणि वाड्या-वस्त्यांवर बालके, गरोदर महिला व स्तनदा माता यांच्या पोषणाची जबाबदारी अंगणवाडी सेविका सांभाळत असतात. त्यांच्या या कामाची दखल घेत शासनाने हा निर्णय घेतला आहे.
- एकूण अंगणवाडी सेविका: १,०८,६२७
- एकूण अंगणवाडी मदतनीस: १,०५,४७०
- एकूण लाभार्थी संख्या: २,१४,०९७
- भाऊबीज भेट रक्कम: प्रत्येकी ₹२,००० (थेट खात्यात जमा होणार)
- एकूण मंजूर निधी: ₹४२.८१ कोटी
दिवाळीपूर्वीच खात्यात रक्कम होणार जमा
राज्यातील ग्रामीण व शहरी भागात कुपोषणमुक्तीसाठी अहोरात्र काम करणाऱ्या या महिला कर्मचाऱ्यांचा सण आनंदाचा जावा, यासाठी ही रक्कम दिवाळीपूर्वीच थेट त्यांच्या बँक खात्यावर वर्ग करण्यात येणार असल्याचे महिला व बालविकास विभागाकडून स्पष्ट करण्यात आले आहे.
दरम्यान, आजच्या मंत्रिमंडळ बैठकीत दुष्काळग्रस्त शेतकऱ्यांना ५ हजार रुपयांची मदत जाहीर करण्यासोबतच अंगणवाडी भगिनींनाही भाऊबीज भेट देण्याचा निर्णय झाल्याने सर्व स्तरांतून समाधान व्यक्त केले जात आहे.
More Read
