सांगली (सांगली टुडे वृत्तसेवा) : जमिनीची मोजणी, वाटणी किंवा मालकी हक्काशी संबंधित महसुली वाद एकदा सुरू झाले की वर्षानुवर्षे संपत नाहीत. एका स्तरावर निकाल लागला तरी असंतुष्ट पक्षकार लगेच वरिष्ठ न्यायालयात दाद मागतात. परिणामी, सामान्य नागरिक आणि शेतकऱ्यांचा वेळ आणि पैसा दोन्ही वाया जाते. हाच न्यायालयीन फेरा थांबवून वाद कायमस्वरूपी निकाली काढण्यासाठी सांगलीत पुढाकार घेण्यात आला आहे.
येत्या गुरुवारी, १५ ऑक्टोबर २०२६ रोजी सांगलीतील जिल्हा अधीक्षक भूमी अभिलेख कार्यालयात ‘महात्मा जोतिराव फुले महसूल लोक अदालती’चे आयोजन करण्यात आले आहे. सांगली-मिरज रस्त्यावरील विजयनगर येथील मध्यवर्ती प्रशासकीय इमारतीच्या पहिल्या मजल्यावर सकाळी ११ वाजल्यापासून ही लोक अदालत पार पडेल.
अनेकदा जमिनीच्या दाव्यांमध्ये दोन्ही पक्षकारांनी समोरासमोर बसून समजूतदारपणा दाखवला, तर अनेक वर्षांपासून रखडलेली प्रकरणे एका दिवसात तडजोडीने निकाली निघू शकतात. याच हेतूने शासनाच्या निर्देशानुसार ही अदालत भरवली जात आहे. अपिलातील दोन्ही पक्षकार स्वतः उपस्थित राहून किंवा आपल्या वकिलामार्फत तडजोडीचा अर्ज सादर करू शकतात.
सामंजस्याने तोडगा निघाल्यास पुढील अपीलांचा फेरा टळणार असून पक्षकारांचा न्यायालयीन खर्च आणि वेळ वाचणार आहे. त्यामुळे ज्या नागरिकांचे किंवा शेतकऱ्यांचे दावे जिल्हा अधीक्षक भूमी अभिलेख कार्यालयाकडे प्रलंबित आहेत, त्यांनी १५ ऑक्टोबर रोजी उपस्थित राहून आपली प्रकरणे निकाली काढावीत, असे आवाहन जिल्हा अधीक्षक भूमी अभिलेख सुधाकर पाटील यांनी केले आहे.
हेही वाचा: सांगली-मिरज-कुपवाडची लोकसंख्या माहित आहे का? पाहा आधीची आकडेवारी आणि २०२६ चा अंदाज.
हेही वाचा
