जत : दुष्काळ, पाणीटंचाई आणि अपुऱ्या सुविधांमुळे जत तालुक्यातील नागरिकांना विविध अडचणींचा सामना करावा लागत असल्याच्या पार्श्वभूमीवर सर्वपक्षीय रास्ता रोको आंदोलन करण्यात आले. या आंदोलनातून पाणी, शेती, पशुधन आणि वीजपुरवठ्याशी संबंधित विविध मागण्या शासनाकडे करण्यात आल्या.
जत तालुक्यातील पाणीटंचाईचा प्रश्न गंभीर असून, म्हैसाळ उपसा सिंचन योजनेचे आवर्तन पूर्ण क्षमतेने सुरू करावे, अशी प्रमुख मागणी करण्यात आली. तसेच पिण्याच्या पाण्यासाठी तातडीने टँकर सुरू करावेत, जनावरांसाठी चारा आणि पाण्याची व्यवस्था करावी, अशी मागणी आंदोलकांनी केली.
शेतकऱ्यांना दिवसा पुरेसा वीजपुरवठा मिळावा, स्मार्ट मीटरची सक्ती रद्द करावी, तसेच तालुक्यातील अवैध धंद्यांवर कठोर कारवाई करावी, या मागण्याही आंदोलनातून मांडण्यात आल्या. याशिवाय जतचे नामांतर करू नये, अशी मागणीही करण्यात आली.
आमदार विक्रम सावंत यांनी जतच्या जनतेला दुष्काळ, पाणीटंचाई आणि अपुऱ्या सुविधांचा फटका बसत असल्याचे सांगितले. वेळोवेळी निवेदने देऊनही ठोस निर्णय होत नसल्याने सर्वपक्षीय आंदोलनाच्या माध्यमातून जतकरांचा आवाज शासनापर्यंत पोहोचवण्यात आल्याचे त्यांनी म्हटले.
या मागण्या कोणत्याही एका पक्षाच्या नसून जतच्या जनतेच्या आहेत. त्यामुळे शासनाने केवळ आश्वासन न देता तातडीने ठोस निर्णय घ्यावेत, अशी भूमिका आंदोलनातून मांडण्यात आली. मागण्या मार्गी लागेपर्यंत संघर्ष सुरू ठेवण्याचा इशाराही आंदोलनादरम्यान देण्यात आला.
