सांगली / पुणे : गेल्या काही दिवसांपासून पुण्यात एमपीएससी (MPSC) विद्यार्थ्यांचे आंदोलन राज्यभरात चर्चेत आहे. अनेक नेते आणि आमदारांनी या आंदोलनाला भेट देऊन विद्यार्थ्यांची बाजू समजून घेतली. मात्र, या आंदोलनात शांतपणे, कोणतीही प्रसिद्धी न मागता सेवा देणाऱ्या एका विद्यार्थ्याने सांगलीचे काँग्रेस आमदार डॉ. विश्वजीत कदम यांचे मन जिंकले आहे. डॉ. कदम यांनी ‘धनंजय’ नावाच्या या विद्यार्थ्याच्या योगदानाबद्दल सोशल मीडियावर एक अत्यंत भावूक पोस्ट लिहीत त्याचे मनापासून कौतुक केले आहे.
“रामसेतूतील खारीच्या वाट्यासारख काम!”
डॉ. विश्वजीत कदम यांनी आपल्या पोस्टमध्ये म्हटल आहे की, “माझ्या सामाजिक आणि राजकीय प्रवासात अनेक आंदोलन आणि मोर्चे अनुभवले. पण एमपीएससी विद्यार्थ्यांच्या या आंदोलनाने एक वेगळाच अनुभव दिला. विवेकानंद पाटील, ऋषिकेश गांगुर्डे यांच्यासारख्या विद्यार्थ्यांसोबत वेळ घालवताना खूप काही शिकायला मिळाल. मात्र, या सगळ्या चर्चेत प्रसिद्धीच्या झोतात न आलेला एक चेहरा माझ्या मनात कायमचे घर करून गेला, तो म्हणजे धनंजय!“
तहानलेल्या आंदोलकांना अविरत पाणी वाटप
गेल्या दहा दिवसांपासून हे आंदोलन सुरू आहे. डॉ. कदम यांनी नमूद केल की, “धनंजय कोणत्याही प्रसिद्धीची अपेक्षा न ठेवता आंदोलनस्थळी येणाऱ्या विद्यार्थ्यांना आणि इतरांना पाणी पोहोचवण्याच काम अविरतपणे करत आहे. ना स्वतःचे नाव व्हावे म्हणून धडपड, ना कुणी कौतुक करावे अशी अपेक्षा! तहानलेल्या माणसाला पाणी मिळावे एवढ्याच भावनेने तो आपल काम करत राहिला.”
“प्रत्येकाला मोठ काम करता येईलच असे नाही; पण आपल्या क्षमतेनुसार दुसऱ्याच्या संघर्षात हातभार लावता येतो, हे धनंजयने दाखवून दिल. रामसेतू बांधताना खारीने दिलेल्या छोट्या योगदानासारखेच हे कार्य आहे,” अशा शब्दांत डॉ. कदम यांनी धनंजय आणि त्याच्यावर संस्कार करणाऱ्या आई-वडिलांचा गौरव केला.
हेही वाचा: सांगलीकरांनो लक्ष द्या! जिल्ह्यात दुचाकींसाठी ‘ही’ नवी मालिका सुरू; पसंतीचा नंबर कसा मिळवाल?.
