मुंबई (सांगली टुडे वृत्तसेवा) : राज्यातील दुष्काळसदृश परिस्थितीमुळे शेतकरी आणि सर्वसामान्य कुटुंबे आर्थिक अडचणींचा सामना करत असताना, राज्य शासनाने महाविद्यालयीन विद्यार्थ्यांच्या हितासाठी मोठा निर्णय घेतला आहे. राज्यातील ३४ जिल्ह्यांमधील २६५ तालुक्यांमध्ये दुष्काळ जाहीर करण्यात आला असून, या भागातील विद्यार्थ्यांचे परीक्षा शुल्क माफ करण्याचे निर्देश उच्च व तंत्रशिक्षण विभागाने दिले आहेत. या संदर्भात उच्च शिक्षण संचालनालयाने अधिकृत परिपत्रकही जारी केले आहे.
शुल्क वसूल करणाऱ्या महाविद्यालयांवर कारवाई
उच्च व तंत्रशिक्षण मंत्री चंद्रकांतदादा पाटील यांनी स्पष्ट केले की, दुष्काळग्रस्त भागातील विद्यार्थ्यांकडून परीक्षा शुल्क न घेण्याची भूमिका शासनाने घेतली आहे. त्यामुळे शासन निर्णयाचे उल्लंघन करून कोणत्याही विद्यार्थ्याकडून परीक्षा शुल्क वसूल करणाऱ्या महाविद्यालयांची गंभीर दखल घेतली जाईल आणि त्यांच्यावर नियमानुसार कारवाई करण्यात येईल. परीक्षा शुल्क आकारले जाणार नाही याची दक्षता विद्यापीठ प्रशासनाने घ्यावी, अशा सक्त सूचना डॉ. बाबासाहेब आंबेडकर मराठवाडा विद्यापीठासह सर्व विद्यापीठांना देण्यात आल्या आहेत.
सांगली जिल्ह्यातील ४ तालुक्यांसह २६५ तालुक्यांना लाभ
शासनाने खरीप हंगामात ‘ट्रिगर १’ (Trigger 1) अंतर्गत राज्यातील २६५ तालुक्यांमध्ये दुष्काळी परिस्थिती जाहीर केली आहे. यामध्ये सांगली जिल्ह्यातील मिरज, आटपाडी, जत आणि कवठेमहांकाळ या ४ तालुक्यांचा समावेश आहे. याशिवाय:
पुणे विभाग: सांगली (४), सोलापूर (११), सातारा (६), पुणे (८), कोल्हापूर (६)
छत्रपती संभाजीनगर विभाग: बीड (११), लातूर (१०), छत्रपती संभाजीनगर (९), परभणी (९), नांदेड (१४), जालना (८), धाराशिव (८), हिंगोली (५)
नाशिक विभाग: जळगाव (१५), अहिल्यानगर (१४), नाशिक (१०), नंदुरबार (६), धुळे (४)
विदर्भ व कोकण: यवतमाळ (१६), अमरावती (१४), बुलढाणा (१३), नागपूर (१४), चंद्रपूर (१२), सिंधुदुर्ग (८) यांसह इतर तालुक्यांचा समावेश आहे.
दुष्काळामुळे शेतकरी आणि कष्टकरी कुटुंबांवर आधीच आर्थिक संकट ओढवले आहे. अशा काळात विद्यार्थ्यांवर परीक्षा शुल्काचा अतिरिक्त भार पडू नये, हीच शासनाची प्राथमिकता असल्याचे मंत्री चंद्रकांतदादा पाटील यांनी नमूद केले.
हेही वाचा: लाडकी बहीण योजना: हप्ता कधी जमा होणार? खात्यात ₹१५०० ऐवजी ₹२१०० येणार? शासनाचा मोठा खुलासा.
