सांगली (सांगली टुडे वृत्तसेवा) : सांगली जिल्ह्याच्या औद्योगिक, व्यापारी आणि कृषी क्षेत्राला मोठी गती मिळवून देणाऱ्या मौजे कवलापूर (ता. मिरज) येथील प्रस्तावित कार्गो व नागरी विमानतळासंदर्भात मंत्रालयात झालेल्या उच्चस्तरीय बैठकीला आज १४ ऑक्टोबर २०२६ रोजी बरोबर एक वर्ष पूर्ण झाले आहे. गेल्या वर्षी याच दिवशी या प्रकल्पाला गती देण्यासाठी मंत्रालयात एका विशेष बैठकीचे आयोजन करण्यात आले होते. या बैठकीला वर्षपूर्ती झाल्याच्या पार्श्वभूमीवर, या महत्त्वपूर्ण प्रकल्पाची प्रशासकीय पातळीवरील प्रगती नेमकी कुठवर आली आहे, याचा घेतलेला हा वस्तुनिष्ठ आढावा.
गेल्या वर्षी १४ ऑक्टोबर २०२५ रोजी मुंबईतील मंत्रालयात उच्च व तंत्रशिक्षण मंत्री चंद्रकांत पाटील आणि उद्योगमंत्री डॉ. उदय सामंत यांच्या प्रमुख उपस्थितीत कवलापूर विमानतळ उभारणीसंदर्भात बैठक पार पडली होती. या बैठकीस खासदार विशाल पाटील, आमदार सुरेश खाडे, आमदार सुधीर गाडगीळ, आमदार विश्वजीत कदम, आमदार सुहास बाबर यांच्यासह उद्योग व महसूल विभागाचे वरिष्ठ सचिव, एमआयडीसीचे वरिष्ठ अधिकारी आणि जिल्हाधिकारी दूरदृश्य प्रणाली द्वारे सहभागी झाले होते.
मंत्रालयातील बैठकीतील प्रमुख मुद्दे:
या उच्चस्तरीय बैठकीत कवलापूर विमानतळाचा मार्ग सुकर करण्यासाठी प्रशासकीय पातळीवर खालील महत्त्वाच्या बाबींवर सविस्तर चर्चा झाली होती:
- अतिरिक्त जमीन संपादन प्रक्रिया: कवलापूर येथे महाराष्ट्र औद्योगिक विकास महामंडळाच्या ताब्यात असलेल्या ६६.३६ हेक्टर क्षेत्राव्यतिरिक्त आणखी १०० हेक्टर क्षेत्र संपादित करण्याबाबत सकारात्मक चर्चा झाली होती.
- विमानतळ प्राधिकरणाकडून सर्व्हे: विमानतळ प्राधिकरणाशी (AAI) समन्वय साधून आवश्यक जमिनीचा विजिबल सर्व्हे तातडीने पूर्ण करून घेण्याचे निर्देश उद्योगमंत्र्यांनी प्रशासनाला दिले होते.
- दोन वर्षांत काम पूर्ण करण्याचा मानस: सर्व तांत्रिक आणि प्रशासकीय परवानग्या वेळेत पूर्ण करून पुढील दोन वर्षांत सांगलीकरांचे हे विमानतळ प्रत्यक्षात आणण्याचा मानस त्यावेळी व्यक्त करण्यात आला होता.
प्रकल्पाची सद्यस्थिती काय?
बैठकीला एक वर्ष पूर्ण झाल्यानंतर आता या प्रकल्पाची पुढील प्रक्रिया वेगाने व्हावी, अशी अपेक्षा सांगलीकरांमधून व्यक्त केली जात आहे. सांगली आणि मिरज ही शहरे पश्चिम महाराष्ट्रातील मोठी व्यापारी, हळद बाजारपेठ, द्राक्ष निर्यात आणि वैद्यकीय सेवांची केंद्रे आहेत. त्यामुळे जिल्ह्याला स्वतंत्र कार्गो व नागरी विमानतळ उपलब्ध झाल्यास येथील अर्थव्यवस्थेला मोठा फायदा होणार आहे.
प्रशासकीय पातळीवर अतिरिक्त जमीन संपादनाचा प्रस्ताव, विमानतळ प्राधिकरणाचा तांत्रिक अहवाल आणि आवश्यक निधीची तरतूद या बाबी अजूनही प्रक्रियेत असून, या प्रक्रियेला गती कधी मिळेल आणि कवलापूर विमानतळाचे काम प्रत्यक्ष कधी सुरू होईल, याकडे संपूर्ण सांगली जिल्ह्याचे लक्ष लागून राहिले आहे.
हेही वाचा: स्वतःचा व्यवसाय सुरू करायचाय? सरकार देणार भांडवल आणि बाजारपेठ; महाराष्ट्रात सुरू झाले ‘महिला उद्योजकता हब’.
More Read
