मुंबई (सांगली टुडे वृत्तसेवा) : स्वतःच्या पायावर उभे राहून उद्योग-व्यवसाय करू इच्छिणाऱ्या आणि बचत गटांच्या माध्यमातून काम करणाऱ्या राज्यातील महिलांसाठी एक आनंदाची बातमी समोर आली आहे. महिलांच्या नवीन व्यवसायांना आवश्यक असणारे भांडवल (कर्ज), तयार उत्पादनांसाठी हक्काची बाजारपेठ आणि व्यवसाय वाढवण्यासाठी तज्ज्ञांचे मार्गदर्शन एकाच छताखाली उपलब्ध करून देण्यासाठी महाराष्ट्र शासनाने ‘महिला उद्योजकता हब’ स्थापन करण्याचा महत्त्वपूर्ण निर्णय घेतला आहे.
या महत्त्वाकांक्षी उपक्रमासाठी ‘महाराष्ट्र राज्य नावीन्यता सोसायटी’ आणि ‘उदैती फाउंडेशन’ यांच्यात अधिकृत सामंजस्य करार करण्यात आला आहे. यामुळे राज्यातील महिला उद्योजकांना शासकीय योजनांचा थेट लाभ घेऊन स्वतःचा उद्योग मोठा करता येणार आहे.
महिलांना या हबमधून नेमकी काय मदत मिळणार?
अनेक महिलांकडे व्यवसाय कौशल्य आणि जिद्द असते, मात्र पैशांची अडचण किंवा विक्रीसाठी योग्य बाजारपेठ नसल्यामुळे उद्योग थांबतो. या हबच्या माध्यमातून महिलांना खालील ४ प्रमुख आघाड्यांवर थेट पाठबळ दिले जाईल:
- कर्ज व वित्तपुरवठा (भांडवल मिळण्यास मदत): व्यवसाय सुरू करण्यासाठी किंवा सध्या चालू असलेला व्यवसाय वाढवण्यासाठी बँका आणि शासकीय योजनांच्या माध्यमातून सुलभ कर्ज मिळवून देण्यास मदत केली जाईल.
- उत्पादनांसाठी हक्काची बाजारपेठ : महिलांनी अथवा बचत गटांनी तयार केलेल्या वस्तूंना थेट खरेदीदारांशी आणि मोठ्या बाजारपेठांशी जोडले जाईल, जेणेकरून विक्री वाढेल.
- व्यवसाय मार्गदर्शन आणि पॅकिंग/ब्रँडिंग: उद्योग सुरू करताना कागदपत्रे कशी तयार करावीत, मालाचे पॅकिंग, ब्रँडिंग कसे करावे आणि डिजिटल माध्यमांतून विक्री कशी करावी, याचे मोफत प्रशिक्षण दिले जाईल.
- जिल्हानिहाय मदत व स्टार्टअप्सना बळ: ग्रामीण आणि शहरी भागातील महिलांच्या व्यवसायांचे मूल्यमापन करून स्थानिक पातळीवर त्यांना आवश्यक ती सर्व शासकीय मदत मिळवून दिली जाईल.
महिलांच्या आर्थिक सक्षमीकरणाला मिळणार गती
कौशल्य, रोजगार, उद्योजकता व नावीन्यता मंत्री मंगलप्रभात लोढा यांच्या नेतृत्वाखाली झालेल्या या करारावर महाराष्ट्र राज्य नावीन्यता सोसायटीचे मुख्य कार्यकारी अधिकारी डॉ. श्रीकांत पाटील आणि उदैती फाउंडेशनच्या पूजा शर्मा गोयल यांनी स्वाक्षऱ्या केल्या.
राज्यातील महिलांनी यशस्वी उद्योजक म्हणून पुढे येण्यासाठी शासन सर्वतोपरी सहकार्य करेल, असा विश्वास यावेळी व्यक्त करण्यात आला.
हेही वाचा: शेतकरी कर्जमुक्ती योजनेची तिसरी यादी जाहीर; ३.५१ लाख शेतकऱ्यांचे २ लाखांपर्यंतचे कर्ज माफ.
More Read
