मुंबई/सांगली (सांगली टुडे वृत्तसेवा): चालू खरीप हंगामात अस्मानी संकटांमुळे शेतकरी आधीच अडचणीत सापडला आहे. अशा परिस्थितीत सोयाबीन, तूर, उडीद आणि मूग उत्पादक शेतकऱ्यांना किमान खर्चावर आधारित योग्य मोबदला मिळावा, यासाठी शासनाने हमीभाव खरेदीची तयारी सुरू केली आहे. शेतकऱ्यांचा माल वेळेत आणि विनाअडथळा खरेदी व्हावा यासाठी राज्यात ९५० हून अधिक हमीभाव खरेदी केंद्रे सुरू करण्याचे निर्देश पणन मंत्री जयकुमार रावल यांनी प्रशासनाला दिले आहेत. गोदामांमध्ये धान्य साठवण्यासाठी १५ लाख २८ हजार मेट्रिक टन क्षमतेची व्यवस्था करण्यात येत आहे.
यंदाच्या हंगामात केंद्र सरकारने प्रमुख पिकांच्या हमीभावात काही प्रमाणात वाढ केली आहे. यामध्ये सोयाबीनच्या दरात क्विंटलमागे ३८० रुपयांची वाढ होऊन नवा दर ५ हजार ७०८ रुपये प्रति क्विंटल ठरवण्यात आला आहे. तसेच तुरीच्या भावात ४५० रुपयांची वाढ करून दर ८ हजार ४५० रुपये, तर उडदाच्या भावात ४०० रुपयांची वाढ होऊन नवा भाव ८ हजार २०० रुपये प्रति क्विंटल निश्चित करण्यात आला आहे.
कागदावर दर वाढले तरी प्रत्यक्षात खरेदी केंद्रांवर वेळेवर बारदाना न मिळणे, लांबलचक रांगा आणि खरेदी उशिरा सुरू होणे अशा अडचणी दरवर्षी शेतकऱ्यांच्या वाट्याला येतात. याची पुनरावृत्ती टाळण्यासाठी यंदा खरेदी केंद्रांवर पिण्याचे पाणी, बैठक व्यवस्था, स्वच्छतागृहे, बारदाना आणि वाहतुकीची चोख सोय ठेवण्याचे आदेश देण्यात आले आहेत. गैरप्रकार टाळण्यासाठी क्यूआर कोड टॅगिंगसारखी पारदर्शक पद्धत वापरली जाईल, असेही सांगण्यात आले आहे. त्यामुळे आता घोषणांनंतर प्रत्यक्ष खरेदी केंद्रे किती वेगाने सुरू होतात आणि शेतकऱ्यांच्या खात्यात वेळेवर पैसे कधी पडतात, याकडेच बळीराजाचे लक्ष लागले आहे.
More Read
