सांगली (सांगली टुडे वृत्तसेवा): राज्य मंत्रिमंडळाच्या बैठकीत दुष्काळग्रस्त शेतकऱ्यांना जाहीर करण्यात आलेल्या ५ हजार रुपयांच्या आर्थिक मदतीवरून सांगलीचे खासदार विशाल पाटील यांनी राज्य सरकारवर तीव्र शब्दांत ताशेरे ओढले आहेत. “शेतकऱ्याला ५ हजार रुपयांची भीक नको, तर त्याच्या घामाला योग्य दाम, हमीभाव आणि कर्जमाफी हवी,” असा घणाघात करत त्यांनी सरकारचे हे धोरण शेतकऱ्यांच्या जखमेवर मीठ चोळणारे असल्याचा आरोप केला आहे.
नुकत्याच पार पडलेल्या मंत्रिमंडळ बैठकीत शासनाने राज्यातील दुष्काळग्रस्त शेतकऱ्यांना ५ हजार रुपयांची अग्रीम मदत जाहीर केली. यावर थेट आक्षेप घेत खासदार विशाल पाटील म्हणाले की, शेतकरी बांधवांनी वर्षभर रक्ताचे पाणी करून, लाखो रुपयांचे भांडवल लावून पिके उभी केली आहेत. सध्या तीव्र दुष्काळाशी झुंजणाऱ्या शेतकऱ्यांच्या हातावर अवघे ५ हजार रुपये टेकवून दिवाळी साजरी करायला सांगणाऱ्या सरकारला लाज वाटली पाहिजे. ही मदत नसून केवळ जखमेवर केलेली तात्पुरती मलमपट्टी आहे, अशी टीका त्यांनी केली.
शेतकऱ्यांच्या कष्टांची किंमत अवघ्या पाच हजारांत मोजून सरकार आपली जबाबदारी झटकत असल्याचे सांगत खासदार पाटील म्हणाले की, आज बळीराजाला खरी गरज पीकविम्याची पूर्ण भरपाई, संपूर्ण कर्जमाफी आणि संकटाच्या काळात मोठ्या आर्थिक पॅकेजची आहे. मात्र शासन या मूलभूत मागण्यांवर केवळ वेळकाढूपणा करत आहे. ५ हजार रुपयांच्या या तुटपुंज्या मदतीत शेतकऱ्यांची दिवाळी साजरी होणे अशक्य असून, या निर्णयावरून सरकारचे शेतकरीविरोधी धोरण पुन्हा एकदा उघडे पडले आहे, असा आरोपही त्यांनी केला.
