सांगली टुडे वृत्तसेवा: पॅसिफिक महासागरात सक्रिय झालेल्या ‘एल निनो’मुळे यंदा मान्सून आणि तापमानावर मोठा परिणाम झाला असून दुष्काळी परिस्थितीचे सावट निर्माण झाले आहे. सांगली जिल्ह्यात ऊस हे प्रमुख नगदी पीक असले, तरी पाटपाण्यावर अवलंबून असलेल्या या पिकाला मोठ्या प्रमाणावर पाणी लागते. या गंभीर समस्येवर मात करण्यासाठी आणि कमी पाण्यात भरघोस पीक घेण्यासाठी आता शेतीमध्ये थेट ‘कृत्रिम बुद्धिमत्ता’ म्हणजेच AI तंत्रज्ञानाचा वापर सुरू झाला आहे. सांगलीत कृषी विभागातर्फे आयोजित विशेष कार्यशाळेत दुष्काळावर मात करत ‘एकरी १५० टन ऊस उत्पादन’ घेण्याचे उद्दिष्ट शेतकऱ्यांसमोर ठेवण्यात आले.
तालुक्यातील शेतकरी सुजित हांडे पाटील यांच्या शेतात कृषी विभागाच्या वतीने या विशेष शेतकरी मार्गदर्शन कार्यक्रमाचे आयोजन करण्यात आले होते. आधुनिक तंत्रज्ञान आणि ठिबक सिंचनाचा मेळ घालून ऊस उत्पादनात मोठी क्रांती कशी घडवता येते, याचे प्रात्यक्षिक यावेळी शेतकऱ्यांना देण्यात आले.
सेन्सर्स आणि AI मुळे पाणी व खतांची मोठी बचत
कार्यक्रमाचे प्रमुख वक्ते आणि महाराष्ट्र राज्य फायलोचे व्यवस्थापक विशाल मिरजे यांनी शेतकऱ्यांना तंत्रज्ञानाची सविस्तर माहिती दिली. ते म्हणाले की, “सध्याच्या हवामान बदलाच्या काळात पारंपरिक पद्धती सोडून आधुनिक ऊस लागवड तंत्रज्ञान आणि ठिबक सिंचनाचा वापर करणे ही काळाची गरज बनली आहे. शेतात बसवलेले विविध सेन्सर्स आणि एआय अल्गोरिदमच्या मदतीने जमिनीतील नेमका ओलावा किती आहे, हे अचूक समजते. त्यामुळे पिकाला गरजेपुरतेच पाणी दिले जाते.”
तसेच योग्य वेळी आणि योग्य त्या प्रमाणातच खताची मात्रा देणे या तंत्रज्ञानामुळे शक्य होते. सर्वात महत्त्वाचे म्हणजे, पिकावर पडणारा कीड व रोगांचा प्रादुर्भाव सुरुवातीच्या टप्प्यातच एआयच्या साहाय्याने ओळखता येतो. त्यामुळे रोगांचा फैलाव होण्यापूर्वीच त्यावर नियंत्रण मिळवणे सोपे होते आणि खर्चात बचत होऊन उत्पादनात प्रचंड वाढ होते, असे त्यांनी स्पष्ट केले.
स्थानिक शेतकऱ्यांचा उत्स्फूर्त प्रतिसाद
या आधुनिक प्रशिक्षण कार्यक्रमास मंडळ कृषी अधिकारी सुधीर यादव, सहाय्यक कृषी अधिकारी दिलीप मिरेकर, कार्यक्रमाचे संयोजक अमित सूर्यवंशी आणि उप कृषी अधिकारी प्रदीप माळी यांच्यासह परिसरातील शेतकरी प्रदीप पाटील, मोहन बोळाज, दिलीप बोळाज, अनिल शिंदे, अभिजीत शिंदे, शिवाजी चौगुले, प्रकाश पाटील, प्रमोद पाटील आणि अंजुम महात यांच्यासह शेतकरी बांधव उपस्थित होते. दुष्काळी परिस्थितीतही शाश्वत शेती करून उत्पन्नाचा आलेख उंचावणारा नवा मार्ग मिळाल्याचे समाधान यावेळी उपस्थित शेतकऱ्यांनी व्यक्त केले.
शेतीतील आधुनिक प्रयोग, सांगलीसह राज्यातील बाजारभाव आणि शेतीत AI तंत्रज्ञानाचा अचूक वापर कसा करावा याचे महत्त्वाचे अपडेट्स जाणून घेण्यासाठी ‘महाराष्ट्र अपडेट्स’ व्हॉट्सॲप चॅनेल नक्की फॉलो करा. 👉 ‘महाराष्ट्र अपडेट्स’ व्हॉट्सॲप चॅनेल फॉलो करा.
More Read
