सांगली टुडे न्यूज नेटवर्क : पुणे पदवीधर आणि शिक्षक मतदारसंघातील मतदारांसाठी महत्त्वाची बातमी आहे. या मतदार संघात सांगली जिल्ह्याचा थेट समावेश असून, स्थानिक पदवीधर तरुण आणि शिक्षकांनी मतदार यादीत आपले नाव समाविष्ट आहे की नाही, याची वेळेत खात्री करून घेणे आवश्यक आहे. प्रशासनाकडून मतदारांना घरबसल्या मोबाईलवर आपले नाव आणि मतदान केंद्र तपासण्याची ऑनलाईन सुविधा उपलब्ध करून देण्यात आली आहे.
बऱ्याचदा नव्याने अर्ज केलेल्या मतदारांना आपले नाव प्रत्यक्ष यादीत आले आहे की नाही, तसेच मतदानाचा भाग क्रमांक कोणता आहे याची माहिती नसते. यासाठी खालील सोप्या पद्धतीचा वापर करून एका मिनिटात माहिती मिळवता येईल.
मोबाईलवरून नाव शोधण्याची सोपी पद्धत
१. अधिकृत संकेतस्थळ उघडा: सर्वप्रथम मोबाईल किंवा कॉम्प्युटरवर mahaelection.gov.in हे निवडणूक आयोगाचे पोर्टल उघडा.
२. नोंदणी पर्याय निवडा: मुख्य पानावर (Home Page) दिसणाऱ्या Electoral Registration या पर्यायावर क्लिक करा.
३. मतदारसंघाची निवड करा: तुमच्या अर्जानुसार Graduate (पदवीधर) किंवा Teachers (शिक्षक) यापैकी योग्य मतदारसंघाचा पर्याय निवडा.
४. माहिती प्रविष्ट करा: नाव शोधण्यासाठी तुमच्याकडे अर्जाचा पावती क्रमांक (Acknowledgement Number) असल्यास तो टाका. पावती क्रमांक नसल्यास District–Taluka–Name हा पर्याय निवडून सांगली जिल्हा, तुमचा तालुका आणि स्वतःचे नाव टाका.
५. सर्च करा: खाली दिलेला सुरक्षा कोड (Captcha) भरून Search बटणावर क्लिक करा.
सर्च करताच स्क्रीनवर तुमची मतदार नोंद, भाग क्रमांक आणि प्रत्यक्ष मतदान केंद्राचा पत्ता समोर येईल.
वेळेत नाव तपासणे का महत्त्वाचे?
मतदानाच्या दिवशी मतदान केंद्रावर होणारी धावपळ टाळण्यासाठी तसेच मतदार यादीतील पत्ता, नाव किंवा मतदान केंद्र यामध्ये काही बदल झाला असल्यास त्याची आधीच खात्री करण्यासाठी सर्व पदवीधर आणि शिक्षकांनी आपले नाव तपासून घ्यावे, असे आवाहन करण्यात आले आहे.
More Read
