सांगली टुडे वृत्तसेवा: सांगली जिल्हा मध्यवर्ती सहकारी बँकेच्या (SDCC Bank) संचालक मंडळाच्या उर्वरित ६ जागांसाठी रविवारी अत्यंत चुरशीने विक्रमी ९३.९१ टक्के मतदान पार पडले. जिल्ह्यातील १२ केंद्रांवर एकूण २,४४६ मतदारांपैकी बहुतांश मतदारांनी हक्क बजावल्याने रिंगणातील १३ उमेदवारांचे भवितव्य आता मतपेटीत बंद झाले आहे.
प्रतिष्ठेच्या लढतींकडे संपूर्ण जिल्ह्याचे लक्ष
२१ पैकी १५ जागा आधीच बिनविरोध झाल्या असून, उर्वरित जागांवर अत्यंत प्रतिष्ठेच्या लढती पाहायला मिळाल्या:
- जत सोसायटी गट: भाजप आमदार गोपीचंद पडळकर विरुद्ध काँग्रेसचे विनोद पवार.
- तासगाव गट: माजी खासदार संजयकाका पाटील विरुद्ध माजी आमदार सुमनताई पाटील (आमदार रोहित पाटील यांची प्रतिष्ठा पणाला).
- कवठेमहांकाळ गट: माजी मंत्री अजितराव घोरपडे विरुद्ध टी. व्ही. पाटील.
- मिरज गट: अण्णासाहेब कोरे विरुद्ध भाजपचे अनिल शेगुणशे.
जतमध्ये गोपनीयतेवरून अर्धा तास तणाव
जत मतदान केंद्रावर मतदानाच्या गोपनीयतेचा भंग झाल्याचा आरोप करत काँग्रेसचे माजी आमदार विक्रमसिंह सावंत यांनी आक्षेप घेतला. यामुळे सुमारे अर्धा तास मतदान प्रक्रिया ठप्प झाली होती. मात्र, प्रशासनाच्या हस्तक्षेपानंतर मतदान सुरळीत सुरू झाले. इतर सर्व केंद्रांवर मतदान शांततेत पार पडले.
मंगळवारी (३ नोव्हेंबर) मतमोजणी
या निवडणुकीची मतमोजणी मंगळवारी, ३ नोव्हेंबर रोजी सकाळी ८ वाजता सांगली मार्केट यार्डातील शेतकरी भवनात होणार आहे. चुरशीचे मतदान पाहता जिल्हा बँकेवर कोणाचे वर्चस्व प्रस्थापित होणार, याचा फैसला आता मंगळवारीच स्पष्ट होईल.
More Read
