सांगली (सांगली टुडे वृत्तसेवा) : जिल्ह्यातील दुष्काळी परिस्थितीच्या पार्श्वभूमीवर पाण्याचा प्रत्येक थेंब महत्त्वाचा असून, उपसा सिंचन योजना आणि तलावांवर उपसाबंदी लागू असताना पाण्याची अनधिकृत उचल किंवा पाणीचोरी करणाऱ्यांवर कठोर कायदेशीर कारवाई करा, असे स्पष्ट आणि कडक निर्देश जिल्हाधिकारी डॉ. मैनाक घोष यांनी प्रशासकीय यंत्रणांना दिले आहेत. तसेच ‘ट्रिगर १’ मध्ये दुष्काळ जाहीर केलेल्या तालुक्यातील उर्वरित पीकपंचनामे येत्या आठवडाअखेरीस पूर्ण करण्याचे आदेशही त्यांनी दिले.
जिल्हाधिकारी कार्यालयात आयोजित दुष्काळी उपाययोजनांच्या विशेष आढावा बैठकीत ते बोलत होते. या बैठकीला पाटबंधारे मंडळाचे अधीक्षक अभियंता महादेव कदम, निवासी उपजिल्हाधिकारी डॉ. स्नेहल कनिचे, जिल्हा अधीक्षक कृषी अधिकारी विवेक कुंभार यांच्यासह सर्व संबंधित विभागांचे प्रमुख प्रत्यक्ष व तहसीलदार दूरदृश्यप्रणालीद्वारे उपस्थित होते.
जत तालुक्यात पाणीचोरीवर करडी नजर
जत तालुक्यातील मध्यम प्रकल्प व लघुपाटबंधारे तलावांवर सध्या उपसाबंदी लागू करण्यात आली आहे. मात्र तरीही अनेक ठिकाणी पाण्याची अनधिकृत उचल होत असल्याच्या तक्रारी समोर आल्या आहेत. यावर जिल्हाधिकाऱ्यांनी कठोर भूमिका घेत उपसा सिंचन योजनांद्वारे वितरित होणाऱ्या पाण्याचे काटेकोर नियोजन करण्याचे आणि पाणीपुरवठ्यात अडथळा निर्माण करणाऱ्या पाणीचोरांवर तात्काळ गुन्हे दाखल करण्याचे आदेश दिले आहेत.
दुष्काळग्रस्त ४ तालुक्यांत पावणेतीन लाख शेतकऱ्यांचे पंचनामे पूर्ण
जिल्ह्यात खरीप हंगाम २०२६ मधील दुष्काळी परिस्थितीच्या अनुषंगाने ‘ट्रिगर १’ अंतर्गत दुष्काळ जाहीर झालेल्या जत, आटपाडी, कवठेमहांकाळ आणि मिरज या चार तालुक्यांत पीकपंचनाम्यांची कार्यवाही वेगाने सुरू असल्याची माहिती जिल्हाधिकाऱ्यांनी दिली:
- खातेदार संख्या: चार तालुक्यातील एकूण ३ लाख ४३ हजार ८१६ खातेदारांपैकी २ लाख ७१ हजार ६४५ खातेदारांचे (७९.०१ टक्के) पंचनामे पूर्ण झाले आहेत.
- बाधित क्षेत्र: एकूण २ लाख ८१ हजार ३ हेक्टर क्षेत्रापैकी २ लाख २३ हजार ५२० हेक्टर क्षेत्रावरील (७९.४३ टक्के) पंचनामे पूर्ण झाले आहेत.
- उर्वरित सर्व पीकपंचनामे येत्या आठवडाअखेरपर्यंत पूर्ण करून ई-पीक पाहणीची कार्यवाही गतीने करण्याचे निर्देश जिल्हाधिकाऱ्यांनी दिले आहेत.
पिण्याचे पाणी आणि जनावरांच्या चाऱ्याला प्राधान्य
दुष्काळी परिस्थिती लक्षात घेता उपलब्ध पाणीसाठ्यातून नागरिक व जनावरांच्या पिण्याच्या पाण्याला सर्वोच्च प्राधान्य देण्याचे निर्देश देण्यात आले आहेत. मागणी येताच तात्काळ टँकर सुरू करण्याचे टंचाई कृती आराखडे तयार ठेवण्याचे सांगण्यात आले. चारा टंचाई भासू नये यासाठी शासकीय गायरान जमिनींवर महिला बचत गटांच्या माध्यमातून चारा लागवड करण्यास प्रोत्साहन देण्याच्या सूचनाही बैठकीत देण्यात आल्या.
हे देखील वाचा: पाणीटंचाईवर मात! खानापूर तालुक्यात श्रमदानातून २८ वनराई बंधारे पूर्ण; २२५ बंधाऱ्यांचे उद्दिष्ट.
