सांगली : सांगली-मिरज-कुपवाड महापालिका निवडणुकीत भाजपला आतूनच मोठी स्पर्धा जाणवत असून उमेदवारीसाठी मिळवण्यासाठी आश्चर्यकारक अशी गर्दी पाहायला मिळत आहे. एकूण 78 जागांसाठी तब्बल 570 अर्ज प्राप्त झाले असून, त्यामुळे निवड प्रक्रियेवर मोठा ताण निर्माण झाल्याचे चित्र आहे.
विशेषतः प्रभाग क्रमांक 14 मध्ये उमेदवारीसाठी मोठी चढाओढ पाहायला मिळत असून या एकाच प्रभागातून तब्बल 70 इच्छुकांनी अर्ज दाखल केले आहेत. हा प्रभाग भाजपचा परंपरागत बालेकिल्ला मानला जात असल्याने अनेक कार्यकर्त्यांनी आपली दावेदारी भक्कम केली आहे.
दरम्यान, प्रभाग क्रमांक 13 मध्ये परिस्थिती याच्या अगदी उलट दिसत आहे. येथे तीन जागांसाठी फक्त 10 अर्ज आले आहेत. या प्रभागात 2 महिला व 1 ना.मा.प्र.साठी आरक्षण आहे. तुलनेने कमी अर्ज आल्याने या प्रभागात निवड प्रक्रिया अधिक सोपी होण्याची शक्यता आहे.
निवडणुकांच्या पार्श्वभूमीवर भाजपच्या अंतर्गत स्पर्धेचे चित्र आता स्पष्ट होत असून, उमेदवार निवड हा पुढील काही दिवस पक्षासाठी सर्वात मोठा कसोटीचा मुद्दा ठरणार आहे.
हेही वाचा: घरात घुसलेला बिबट्या दीड तासाच्या ऑपरेशननंतर जेरबंद; पाहण्यासाठी ग्रामस्थांची मोठी गर्दी.
