Kadegaon News Today | कडेगाव (सांगली) : मोहिते वडगाव येथे मंगळवारी दुपारी वृद्ध महिलेला फसवून तब्बल दोन लाख 80 हजार रुपयांचे सोन्याचे दागिने लंपास करण्यात आले. पोलिसांनी एका आरोपीला ताब्यात घेतले असून दोघे फरार आहेत.
सुलोचना भिकाजी मोहिते (वय ७०) घरी एकट्या असताना तिघेजण घरात आले. त्यांनी सोन्याचे दागिने पॉलिश करून देतो, असा बहाणा करत त्यांच्याकडील बांगड्या व पाटल्या मिळून ५६ ग्रॅम सोन्याचे दागिने घेतले. दागिन्यांना द्रवात टाकल्याचा आभास करून संशयितांनी बनावट धातूचे दागिने परत दिले आणि घटनास्थळावरून पसार झाले.
घटनेनंतर महिलेला आपली फसवणूक झाल्याचे लक्षात आल्यावर त्यांनी चिंचणी-वांगी पोलिस ठाण्यात धाव घेतली. पोलिसांनी तत्काळ तपास सुरू करून दुर्गेश किसनकुमार गुप्ता (रा. म्हैसूर बाजार, जमालपूर, जि. खगडिया) याला रात्री उशिरा अटक केली. त्याचे साथीदार योगेश यादव व विकास सहा हे मात्र फरार असून त्यांचा शोध सुरू आहे.
सहायक पोलिस निरीक्षक राहुल घुगे आणि पोलिस उपनिरीक्षक योगेश शेलार यांच्या मार्गदर्शनाखाली या प्रकरणाचा तपास सुरू आहे. घटनेमुळे परिसरात खळबळ उडाली असून नागरिकांमध्ये चिंतेचे वातावरण आहे.
🔴 हेही वाचा 👉 पोलीस ठाण्यात ताब्यातील आरोपीचा गळफास घेऊन आत्महत्येचा प्रयत्न, प्रकृती चिंताजनक.
📍 सांग्लीतील आणखी बातम्या 📍
