Sangli Krishna River Water Level Today | सांगली : रविवारी जिल्ह्यातील काही भागात हलक्या सरी कोसळल्या, पण दिवसाढवळ्या उन्हाची कडाक्याची तीव्रता कायम होती. मात्र, कोयना धरणातून वाढवलेल्या विसर्गामुळे कृष्णा नदीची पाणी पातळी पुन्हा वाढली असून कृष्णेची पाणी पातळी 14 फुटांवर पोहोचली आहे. हरिपूर परिसरात नदीचे पाणी शेतांमध्ये घुसल्याने नदीकाठची शेती पुन्हा पाण्याखाली गेली आहे.
कोयना धरणाचे चार वक्र दरवाजे प्रत्येकी एक फूट उंचीवर उघडण्यात आले असून त्याद्वारे 6,400 क्युसेक विसर्ग सुरू आहे. रविवारी मध्यरात्रीनंतर आणखी दोन दरवाजे उघडले गेले व 3,200 क्युसेक पाणी नदीपात्रात सोडण्यात आले. तसेच पायथा विद्युतगृहाच्या दोन युनिटमधून 2,100 क्युसेक विसर्ग होत आहे. एकूण 11,700 क्युसेक पाणी कोयनेतून सोडले जात असल्याची माहिती अधिकाऱ्यांनी दिली.
या वाढलेल्या विसर्गाचा परिणाम म्हणून सांगलीत तीन दिवसांत कृष्णा नदीची पातळी 14 फुटांवर पोहोचली आहे. नदीलगतच्या गावांना सतर्कतेचा इशारा देण्यात आला असून, प्रशासन परिस्थितीवर बारकाईने लक्ष ठेवून आहे.
जिल्ह्यात 1 ते 21 सप्टेंबरदरम्यान 94.7 मि.मी. पावसाची नोंद झाली आहे. रविवारी सरासरी 1.3 मि.मी. पाऊस झाला. मात्र पाणी पाटळी वाढल्याने नदीकाठच्या शेतकऱ्यांची चिंता पुन्हा एकदा वाढली आहे.
हेही वाचा: आमदार गोपीचंद पडळकर यांच्या वाढदिवसानिमित्त भव्य ओपन बैलगाडा शर्यतीचे आयोजन.
📍 सांग्लीतील आणखी बातम्या 📍
