सांगली (सांगली टुडे वृत्तसेवा): सांगली-मिरज-कुपवाड महानगरपालिकेच्या अग्निशमन सेवेच्या बळकटीकरणासाठी शासनाकडून चार अत्याधुनिक ‘फायर बुलेट’ वाहने प्राप्त झाली आहेत. महापालिका आयुक्त संजीता महापात्रा यांच्या हस्ते या चारही वाहनांचे विधिवत पूजन करून ती अग्निशमन विभागाकडे सोपवण्यात आली. या वाहनांमुळे शहरातील अरुंद रस्ते आणि गल्लीबोळांमध्ये लागणाऱ्या आगीवर तातडीने नियंत्रण मिळवणे शक्य होणार आहे.
महाराष्ट्र शासनाच्या आपत्ती व्यवस्थापन, मदत व पुनर्वसन विभागाच्या धोरणानुसार अग्निशमन सेवांचे सक्षमीकरण करण्यासाठी ही वाहने उपलब्ध करून देण्यात आली आहेत. महापालिका मुख्यालयात झालेल्या या कार्यक्रमावेळी अतिरिक्त आयुक्त राहुल रोकडे, मुख्य अग्निशमन अधिकारी भागवत सोनोने यांच्यासह अग्निशमन विभागातील व महापालिकेचे अधिकारी, कर्मचारी उपस्थित होते.
अरुंद गल्लीबोळांतील आगीवर तत्काळ नियंत्रण मिळवणे होणार सोपे
सांगली आणि मिरज शहरांमधील अरुंद गल्ल्या, दाट वस्तीच्या भागातील अरुंद रस्त्यांवर मोठी अग्निशामक वाहने वेळेत पोहोचणे कठीण होते. अशा ठिकाणी ही ‘फायर बुलेट’ वाहने ‘फर्स्ट रिस्पॉन्डर’ (First Responder) म्हणून अत्यंत जलद गतीने पोहोचू शकणार आहेत. लहान स्वरूपाची आग, डीपी (विद्युत ट्रान्सफॉर्मर), दुचाकी व चारचाकी वाहनांना लागलेली आग यांवर प्राथमिक स्तरावर नियंत्रण मिळवण्यासाठी या दुचाकींचा मोठा फायदा होणार आहे.
शासनाकडून मिळालेल्या या चार नवीन वाहनांमुळे महापालिकेच्या अग्निशमन यंत्रणेची क्षमता वाढली असून, आपत्कालीन परिस्थितीत नागरिकांच्या सुरक्षिततेला अधिक बळकटी मिळणार असल्याचे प्रशासनाने सांगितले.
हेही वाचा: LPG Gas: गॅस सिलिंडर बुक करूनही आला नाही? सिस्टीममधून बुकिंग आपोआप रद्द; याद्या जाहीर, दिवाळीआधी करा हे काम.
