सांगलीपासून अवघ्या काही अंतरावर असलेल्या शिरोळ तालुक्यातील नृसिंहवाडी मार्गावर खिल्लार जातीच्या पाच देशी गोवंशांची अवैध वाहतूक उघडकीस आली आहे. या प्रकरणात पोलिसांनी बोलेरो पिकअप वाहनासह जनावरे ताब्यात घेत संबंधितांविरुद्ध विविध कायद्यांअंतर्गत गुन्हा दाखल केला आहे.
मिळालेल्या माहितीनुसार, कत्तलीच्या उद्देशाने गोवंशांची वाहतूक केली जात असल्याची माहिती काही गोरक्षकांना मिळाली होती. त्यानंतर शिरोळ ते नृसिंहवाडी मार्गावर सापळा रचण्यात आला.
कारवाईदरम्यान बोलेरो पिकअप (एमएच-09-सीयू-5001) या वाहनामध्ये खिल्लार जातीचे चार मोठे बैल आणि एक खोंड अशा एकूण पाच जनावरांची वाहतूक सुरू असल्याचे आढळून आले. वाहनात अपुरी जागा असतानाही जनावरे दाटीवाटीने भरल्याचा तसेच त्यांच्यासाठी चारा व पाण्याची कोणतीही व्यवस्था नसल्याचा आरोप करण्यात आला आहे.
प्राथमिक माहितीनुसार, जनावरांच्या वाहतुकीसाठी आवश्यक परवानगी नसल्याचेही निदर्शनास आले. यानंतर वाहनासह जनावरे ताब्यात घेऊन संबंधितांविरुद्ध महाराष्ट्र प्राणी संरक्षण अधिनियम, प्राण्यांवरील क्रूरता प्रतिबंधक कायदा तसेच मोटार वाहन कायद्यानुसार गुन्हा नोंदविण्याची प्रक्रिया करण्यात आली.
पोलिसांनी जनावरे सुरक्षित ताब्यात घेतली असून प्रकरणाचा पुढील तपास सुरू आहे.
