सांगली टुडे वृत्तसेवा: दिवाळी आणि छठपूजेच्या सणांमुळे प्रवाशांची संख्या प्रचंड वाढली असून नियमित रेल्वेगाड्यांचे कन्फर्म तिकीट मिळणे कठीण झाले आहे. प्रवाशांची ही वाढती गर्दी लक्षात घेऊन दक्षिण पश्चिम रेल्वेने म्हैसूर ते दरभंगा दरम्यान विशेष रेल्वे चालवण्याचा निर्णय घेतला आहे. सर्वात महत्त्वाची बाब म्हणजे या गाडीला सांगली आणि मिरज जंक्शनवर थांबा देण्यात आल्याने परिसरातील हजारो प्रवाशांना याचा फायदा होणार आहे.
दोन्ही बाजूंकडून या विशेष गाडीच्या प्रत्येकी पाच फेऱ्या चालवल्या जाणार असून २४ डब्यांची ही गाडी प्रवाशांच्या सेवेत दाखल होत आहे.
फेऱ्या आणि प्रवासाच्या तारखा
- म्हैसूर ते दरभंगा: २७ ऑक्टोबर ते २४ नोव्हेंबर या काळात धावेल.
- दरभंगा ते म्हैसूर: ३१ ऑक्टोबर ते २८ नोव्हेंबर दरम्यान परतीच्या प्रवासासाठी उपलब्ध असेल.
मिरज आणि पुण्यात गाडीची वेळ काय असेल?
- दरभंगाकडे जाताना: ही गाडी म्हैसूर स्थानकावरून रात्री ८:०५ वाजता निघेल. दुसऱ्या दिवशी दुपारी १:३५ वाजता मिरज जंक्शनला पोहोचेल. त्यानंतर सांगली, कराड, सातारा करत सायंकाळी पुण्याला पोहोचून उत्तर भारताकडे रवाना होईल. तिसऱ्या दिवशी सकाळी ११:३० वाजता ही गाडी दरभंगा येथे पोहोचेल.
- परतीचा प्रवास (म्हैसूरकडे येताना): दरभंगा येथून सकाळी ७:०५ वाजता निघाल्यानंतर दुसऱ्या दिवशी रात्री १०:०० वाजता पुण्यात, तर तिसऱ्या दिवशी मध्यरात्री ३:३० वाजता मिरज जंक्शनवर येईल. त्यानंतर बेळगाव, हुबळीमार्गे त्याच दिवशी सायंकाळी ७:१० वाजता म्हैसूरला पोहोचेल.
🔴 लेटेस्ट
महाराष्ट्रातील प्रमुख थांबे
महाराष्ट्राचा विचार केल्यास मिरज आणि सांगलीसह कराड, सातारा, पुणे, दौंड कॉर्ड लाईन, अहिल्यानगर (अहमदनगर), मनमाड आणि भुसावळ या प्रमुख स्थानकांवर या गाडीला थांबे देण्यात आले आहेत.
सणासुदीच्या काळात उत्तर भारतात जाणारे कामगार, भाविक आणि दक्षिणेकडे प्रवास करणारे नागरिक या सर्वांसाठी ही २४ डब्यांची गाडी मोठा पर्याय ठरणार असून या गाडीमुळे नियमित गाड्यांवरील गर्दीचा ताण कमी होण्यास मदत होईल.
हे ही वाचा: महाराष्ट्रात ‘या’ तारखांना पावसाची शक्यता; विदर्भ-मराठवाड्यासह पश्चिम महाराष्ट्राला अलर्ट.
More Read
