सांगली टुडे हवामान विशेष: सध्या संपूर्ण महाराष्ट्रात ऑक्टोबर हिटचा तडाखा चांगलाच वाढला असून दुपारच्या कडक उन्हाने नागरिक अक्षरशः घामाघूम होत आहेत. मात्र, या प्रचंड उकाड्यामध्येच आता राज्याच्या हवामानात अचानक मोठा बदल होण्याची शक्यता निर्माण झाली आहे. बंगालच्या उपसागरात आणि अरबी समुद्रात एकाच वेळी नवीन हवामान प्रणाली सक्रिय होत असल्याने, येत्या २७ ते २९ ऑक्टोबरदरम्यान महाराष्ट्रातील काही भागांत विजांच्या कडकडाटासह पावसाची शक्यता भारतीय हवामान विभागाने वर्तवली आहे.
सध्याचे वातावरण पाहिले तर मुंबई, ठाणे, पालघर आणि रायगड या किनारपट्टीच्या जिल्ह्यांमध्ये उष्ण आणि दमट हवामानामुळे नागरिकांचे हाल होत आहेत. हवामान खात्याने या पट्ट्यासाठी ‘येलो अलर्ट’ जारी केला आहे. पालघरमधील डहाणू येथे पारा ३८.५ अंशांच्या पुढे गेला असून सोलापूर, जळगाव आणि अमरावतीतही उन्हाचा चटका जाणवत आहे. मात्र, दुसऱ्या बाजूला रत्नागिरी, सिंधुदुर्ग या कोकण पट्ट्यासह सातारा आणि कोल्हापूरच्या काही भागांत पुढील २४ ते ४८ तासांत ढगाळ वातावरणासह हलक्या सरी कोसळण्याचा अंदाज आहे.
या सगळ्यामध्ये विदर्भातील शेतकऱ्यांसाठी पुढील आठवडा अत्यंत महत्त्वाचा ठरणार आहे. बंगालच्या उपसागरात कमी दाबाचे क्षेत्र तीव्र होत असून, त्याचे रूपांतर चक्रीवादळात होण्याची शक्यता आहे. ही प्रणाली पुढे सरकताना २७ ऑक्टोबरपासून विदर्भात वादळी वाऱ्यासह पावसाची चाहूल लागेल, तर २८ आणि २९ ऑक्टोबरला अनेक ठिकाणी मुसळधार ते अतिमुसळधार पावसाचा इशारा देण्यात आला आहे. नागपूर, अमरावती, अकोला, यवतमाळ, वर्धा, चंद्रपूर आणि गडचिरोली या जिल्ह्यांमध्ये सोसाट्याच्या वाऱ्यासह पाऊस पडू शकतो.
दुसरीकडे, सोशल मीडियावर संपूर्ण राज्यात धो-धो पाऊस पडणार अशा अफवा पसरत असल्या तरी हवामान विभागाने वस्तुस्थिती स्पष्ट केली आहे. मराठवाड्यातील छत्रपती संभाजीनगर, जालना, बीड, लातूर किंवा मध्य महाराष्ट्रातील पुणे आणि पश्चिम महाराष्ट्रातील सर्वच जिल्ह्यांमध्ये सरसकट अतिवृष्टी होणार नाही. त्यामुळे शेतकऱ्यांनी घाबरून न जाता स्थानिक पातळीवरील परिस्थिती तपासूनच निर्णय घ्यावा.
सध्या शेतात सोयाबीन काढणी, कापूस वेचणी आणि इतर खरीप पिकांची कामे वेगाने सुरू आहेत. अचानक ढग दाटून येऊन वादळी पाऊस झाल्यास उघड्यावर पडलेल्या शेतमालाचे नुकसान होऊ शकते. त्यामुळे विशेषतः विदर्भ आणि दक्षिण महाराष्ट्रातील शेतकऱ्यांनी काढणी केलेले पीक सुरक्षित ठिकाणी हलवावे किंवा त्यावर ताडपत्री झाकून ठेवावी, तसेच विजांचा कडकडाट सुरू असताना झाडांखाली किंवा मोकळ्या शेतात थांबणे टाळावे.
More Read
