सांगली (सांगली टुडे वृत्तसेवा): राज्यातील महत्त्वाच्या दळणवळण प्रकल्पांना गती देण्यासाठी महाराष्ट्र राज्य रस्ते विकास महामंडळाने (MSRDC) मोठे पाऊल उचलले आहे. पुणे शहराभोवती उभारल्या जाणाऱ्या बहुचर्चित आऊटर रिंग रोडचे उर्वरित काम पूर्ण करण्यासोबतच, विदर्भातील चार महत्त्वाच्या द्रुतगती महामार्गांसाठी MSRDC कडून ताज्या निविदा मागवण्यात आल्या आहेत. या निर्णयामुळे पश्चिम महाराष्ट्रातून पुण्याच्या दिशेने होणारा प्रवास अधिक सुकर होण्यासोबतच समृद्धी महामार्गाचा विस्तार विदर्भाच्या टोकापर्यंत करण्याचा मार्ग मोकळा झाला आहे.
पुणे आऊटर रिंग रोडच्या पूर्व भागातील पॅकेज E5 आणि E6 या दोन महत्त्वाच्या टप्प्यांचा या निविदेत समावेश आहे. प्रस्तावित आखणीनुसार हा मार्ग केसनंद, उरुळी कांचन (पुणे-सोलापूर महामार्ग), सासवड, जेजुरी फाटा आणि खेड शिवापूर मार्गे नसरापूरजवळ पुणे-बंगळुरू राष्ट्रीय महामार्गाला (NH 48) जोडला जाईल. सांगली, कोल्हापूर आणि साताऱ्याकडून पुण्यात जाणाऱ्या प्रवाशांसाठी नसरापूर आणि खेड शिवापूर हे महत्त्वाचे टप्पे आहेत. हा बाह्यवळण मार्ग पूर्ण झाल्यानंतर सोलापूर, अहिल्यानगर आणि मराठवाड्याकडून येणारी अवजड वाहतूक शहरात न शिरता परस्पर बाहेरूनच वळवणे शक्य होईल. परिणामी कात्रज, स्वारगेट आणि हडपसर परिसरातील वाहतूक कोंडीचा प्रश्न मोठ्या प्रमाणावर सुटणार आहे.
हेही वाचा: थंडीचा कडाका वाढणार! पुढील ४ दिवसांत पारा घसरणार; हवामान विभागाचा नवा अंदाज.
दुसऱ्या बाजूला, विदर्भातील औद्योगिक विकास आणि खनिज वाहतुकीला वेग देण्यासाठी चार नवीन ग्रीनफिल्ड महामार्गांची प्रक्रिया सुरू करण्यात आली आहे. यामध्ये नागपूर–गोंदिया एक्स्प्रेसवे, हिंगणघाट व वरोरा मार्गे जाणारा नागपूर–चंद्रपूर एक्स्प्रेसवे आणि ब्रह्मपुरी-वडसा मार्गे जाणारा भंडारा–गडचिरोली एक्स्प्रेसवे या तीन प्रमुख मार्गांचा समावेश आहे. हे तिन्ही मार्ग मुंबई-नागपूर समृद्धी महामार्गाला जोडले जाणार आहेत. याशिवाय गडचिरोली परिसरातील प्रस्तावित पोलाद प्रकल्प आणि खाणींमधील वाहतूक सुरळीत होण्यासाठी नवेगाव मोरे ते सुरजागड असा स्वतंत्र ग्रीनफिल्ड कॉरिडोअर उभारला जाणार आहे.
MSRDC ने जाहीर केलेल्या अधिकृत वेळापत्रकानुसार, पुणे रिंग रोडचे उर्वरित पॅकेजेस आणि विदर्भातील या चारही महामार्गांच्या कामांसाठी मागवण्यात आलेल्या सर्व निविदा २४ डिसेंबर २०२६ रोजी उघडल्या जाणार आहेत. त्यानंतर तांत्रिक छाननी पूर्ण करून पात्र कंत्राटदारांना प्रत्यक्ष कामाचे कार्यादेश दिले जातील.



