सांगली – सांगली, मिरज आणि कुपवाड महापालिका क्षेत्रातील 5 महत्त्वाचे रस्ते लवकरच विकसित होणार आहेत. या रस्त्यांमध्ये येणाऱ्या खासगी आणि शासकीय जागा ताब्यात घेऊन कामांना गती देण्याचे आदेश आयुक्त सत्यम गांधी यांनी दिले असून दोन रस्त्यांमुळे थेट राष्ट्रीय महामार्गाशी जोडणी होणार आहे.
महापालिकेच्या विकास आराखड्यानुसार (डीपी) पाच महत्त्वाचे रस्ते हाती घेण्यात येत आहेत. आयुक्त सत्यम गांधी यांनी सहायक संचालक (नगररचना) विक्रांत गायकवाड व शहर अभियंता पृथ्वीराज चव्हाण यांच्यासह स्थळपाहणी करून संबंधित विभागांना तातडीने कार्यवाहीचे निर्देश दिले आहेत.
विकसित होणारे रस्ते:
पंढरपूर स्मशानभूमीपासून रमा उद्यानाच्या पूर्व बाजूने खाडे स्कूल – सांगलीकर मळा – दिंडीवेस – टाकळी चौक – वखारभाग – म्हैसाळ उड्डाणपुलापर्यंतचा शंभर फुटी डीपी रस्ता
कृपामयी हनुमान मंदिर – सिनर्जी हॉस्पिटल – भारतनगर – ईदगाह मैदान – आर्टस्, कॉमर्स, सायन्स कॉलेज परिसरापर्यंतचा रस्ता
मिरज ते हरिपूर जाणारा जुना हरिपूर रस्ता
विजयनगर जिल्हा न्यायालय – कुंभारमळा – धामणी ग्रामपंचायत हद्दीतून रत्नागिरी–नागपूर राष्ट्रीय महामार्गाला जोडणारा संलग्न रस्ता
विश्रामबाग एमएसईबी रस्ता – स्फूर्ती चौक – सहयोगनगर – धामणी ग्रामपंचायतमार्गे राष्ट्रीय महामार्गाला जोडणारा रस्ता
जागा ताब्यात घेण्याची प्रक्रिया
या रस्त्यांचा बहुतांश भाग महापालिकेच्या ताब्यात असला तरी काही ठिकाणी खासगी मालकीच्या जमिनी आहेत. संबंधित मालकांना TDR (Transferable Development Rights) द्वारे मोबदला देण्यात येणार आहे. तसेच मिरज शासकीय रुग्णालय, गेस्ट हाऊस, सार्वजनिक बांधकाम विभाग यांच्या मालकीच्या जागाही ताब्यात घेण्यात येणार आहेत.
आयुक्त गांधी यांनी नगररचना व शहर अभियंता यांना 7 दिवसांत अहवाल सादर करण्याचे आदेश दिले असून आवश्यक पत्रव्यवहार लवकर पूर्ण करण्याचे निर्देश दिले आहेत.
पार्श्वभूमी व मागणी
क्रेडाई सांगलीचे अध्यक्ष सुनील कोकितकर, उपाध्यक्ष आनंदराव माळी, सचिव दिलीप पाटील, संचालक शैलेश पवार आणि संतोष अष्टेकर यांनी अलीकडेच आमदार सुधीर गाडगीळ यांची भेट घेऊन हे रस्ते विकसित करण्याची मागणी केली होती. त्यानंतर आमदार गाडगीळ यांनी आयुक्तांशी चर्चा केली व कामे गतीमान करण्यास सुरुवात झाली.
या दोन नवीन जोडण्या रत्नागिरी–नागपूर राष्ट्रीय महामार्गाशी थेट संलग्न होणार असल्याने सांगली शहरातील वाहतूक प्रवास सुलभ होणार आहे. विकास आराखड्यातील ही कामे पूर्ण झाल्यावर शहरातील रस्ता जाळ अधिक कार्यक्षम व सुटसुटीत होईल.
🔴 हेही वाचा 👉 बनावट आयकर अधिकार्यांचा बनाव करून कवठेमहांकाळच्या डॉक्टरांच्या घरी कोट्यवधींचा दरोडा.
📍 सांग्लीतील आणखी बातम्या 📍
