सांगली : सांगली शहरात काही महिन्यांपूर्वी ‘टाइमपास’ आणि व्हिडिओ गेमच्या नावाखाली पैसे लावून जुगाराचा खेळ सुरु असणाऱ्या दुकानांवर कारवाई झाल्यानंतर शहरातील बहुतांश दुकाने बंद झाली. मात्र, आता सांगली महानगरपालिका हद्दीबाहेरील परिसरात, विशेषतः माधवनगर ते बुधगाव रोड दरम्यान अशाच प्रकारची दुकाने पुन्हा जोमात सुरू आहेत.
या दुकानांमध्ये ‘टाइमपास’ किंवा गेमिंगच्या नावाखाली थेट पैशांवर खेळ खेळवले जात आहेत. चक्र फिरवणाऱ्या मशीन, पिनॅकल व्हीलसारखे खेळ आणि विविध मशीनद्वारे १००, ५००, १०००, १०००० रुपयांपर्यंत रक्कम लावून गेम खेळण्याची मुभा दिली जात आहे. एखाद्या वेळेस खेळणाऱ्यास जादा रक्कम मिळते, मात्र बहुतांश प्रकरणांमध्ये रोजच्या रोज पैसे गमावले जात असल्याचे स्पष्टपणे दिसून येत आहे.
या प्रकारामुळे सांगली जिल्ह्यातील तरुण पिढी मोठ्या प्रमाणावर आर्थिकदृष्ट्या उद्ध्वस्त होत आहे. शिक्षण, नोकरी आणि कौटुंबिक जबाबदाऱ्यांकडे दुर्लक्ष करून अनेक तरुण या खेळांच्या आहारी गेले असून, काही ठिकाणी कर्जबाजारीपणा आणि मानसिक तणावाची परिस्थितीही निर्माण होत आहे.
शहरात कारवाई झाल्यानंतर ही दुकाने मुद्दाम महानगरपालिका हद्दीबाहेर स्थलांतरित झाल्याचे स्पष्ट आहे. महानगरपालिका हद्दीबाहेर असल्याने नियंत्रण सैल होते आणि त्याचाच गैरफायदा घेऊन हे प्रकार खुलेआम सुरू आहेत. शहरात बंदी, पण अवघ्या दहा मिनिटांच्या अंतरावर पूर्ण मोकळीक अशी विसंगत स्थिती सध्या सांगली परिसरात निर्माण झाली आहे.
या पार्श्वभूमीवर, केवळ महापालिका हद्दीपुरती मर्यादित कारवाई न करता संपूर्ण सांगली जिल्ह्यात एकसमान, कठोर आणि सातत्यपूर्ण उपाययोजना करण्याची गरज निर्माण झाली आहे. अन्यथा ‘टाइमपास’च्या नावाखाली चालणारे हे पैसे लावून खेळले जाणारे खेळ तरुण पिढीचे भविष्य उद्ध्वस्त करत राहतील, हे वास्तव नाकारता येणार नाही.
हेही वाचा: सांगली–मिरज–कुपवाड महापालिकेचा निकाल जाहीर; भाजपचा दणदणीत विजय.
- मिरजमध्ये 17 एप्रिलला विशेष सरकारी शिबीर; सर्व शासकीय सेवा एकाच ठिकाणी
- सांगलीत डॉ. बाबासाहेबांचे जगातील सर्वात मोठे, पहिले रियलॅस्टिक मल्टी-कलर स्ट्रिंग आर्ट
- जतजवळ ट्रेलरची दुचाकीला धडक; 25 वर्षीय तरुणाचा मृत्यू
- सांगलीतील 152 ग्रामपंचायतींची प्रभाग रचना बदलणार? 13 एप्रिलपर्यंत हरकती नोंदवता येणार
- जत : उमदीजवळ भीषण अपघात; ट्रकच्या धडकेत कार चालकाचा मृत्यू, सहा जखमी
- सांगलीची रोजगार योजनेत मोठी झेप; 1375 जणांना व्यवसायासाठी कर्ज मंजुरी
