सांगली : शहरातील धामणी रस्त्यावरील शांतीबन चौकात असलेल्या मयूर नर्सरीमध्ये लागलेल्या आगीत होरपळून मृत्यू झालेल्या निकिता शिव मनगुळे-लोंढे (वय २५) यांच्या मृत्यूचे गूढ अधिकच गडद होत आहे. या प्रकरणात मृत महिलेचा पती शिव मनगुळे-लोंढे अद्याप पसार असून, त्याचा शोध घेण्यासाठी विश्रामबाग पोलिस आणि स्थानिक गुन्हे अन्वेषण विभागाची एकूण पाच पथके रवाना करण्यात आली आहेत.
शुक्रवारी रात्री साडेदहा वाजण्याच्या सुमारास सांगली–धामणी रस्त्यावरील मयूर नर्सरीमधील पत्र्याच्या शेडला अचानक भीषण आग लागली होती. या आगीत नर्सरीमध्ये वास्तव्यास असलेल्या निकिता मनगुळे-लोंढे यांचा होरपळून मृत्यू झाला. घटनेची माहिती मिळताच महापालिकेच्या अग्निशमन विभागाने घटनास्थळी धाव घेत आग आटोक्यात आणली होती.
घटनेनंतर मृत महिलेचा पती शिव मनगुळे-लोंढे हा घटनास्थळावर आढळून न आल्याने संशय व्यक्त केला जात आहे. त्याचा मोबाईल फोन बंद असल्यामुळे पोलिसांच्या शोधकार्यात अडथळे निर्माण होत आहेत. पोलिसांकडून त्याच्या संभाव्य ठिकाणांचा शोध घेतला जात असून नातेवाईक, ओळखीचे लोक आणि तांत्रिक तपासाच्या माध्यमातून माहिती संकलित केली जात आहे.
दरम्यान, या प्रकरणाचा तपास आता खुनाच्या संशयाच्या दृष्टीने सुरू करण्यात आल्याची माहिती पोलिसांनी दिली आहे. प्राथमिक चौकशीत आगीपूर्वी पती-पत्नीमध्ये वाद झाल्याची माहिती समोर आली असून, दोघांमध्ये कौटुंबिक कारणांवरून यापूर्वीही वाद होत असल्याची चर्चा आहे. मात्र, या बाबींची अधिकृत पुष्टी अद्याप झालेली नाही.
शवविच्छेदन अहवाल व तांत्रिक तपासाच्या आधारे पुढील निष्कर्ष काढले जाणार आहेत. निकिताचा मृत्यू नेमका अपघाती आग, शॉर्टसर्किट किंवा अन्य कोणत्या कारणामुळे झाला, याचा सखोल तपास सुरू असल्याचे विश्रामबाग पोलिसांनी सांगितले.
पती शिव मनगुळे-लोंढे याला ताब्यात घेतल्यानंतरच या प्रकरणाचे नेमके कारण स्पष्ट होईल, असे पोलिसांनी सांगितले असून, तपासाची दिशा सध्या सर्व शक्यतांचा विचार करून पुढे नेण्यात येत आहे.
हेही वाचा: राष्ट्रीय मतदार दिनानिमित्त ‘Best ERO’ पुरस्कार; 2024 मधील कामगिरीसाठी IAS विशाल नरवाडे यांचा सन्मान.
- Maharashtra Drought Relief: शेतकऱ्यांची दिवाळी गोड! ३०४ तालुक्यांतील दीड कोटी शेतकऱ्यांना प्रत्येकी ५,००० रुपये थेट खात्यात; राज्य सरकारचा ७,५०० कोटींचा निर्णय, GR जारी
- Maharashtra Weather: बंगालच्या उपसागरात ‘अर्णब’ चक्रीवादळाचे थैमान; गडचिरोलीला ऑरेंज अलर्ट, पश्चिम महाराष्ट्रात पाऊस पडणार का?
- ST Employee Salary: एसटी कर्मचाऱ्यांची दिवाळी गोड होणार! शासनाकडून ₹३९१ कोटींचा निधी मंजूर; खात्यात कधी जमा होणार पगार?
- Gold Price Prediction 2036: येत्या दशकात सोन्याचा भाव कुठे पोहोचेल? जुन्या आकडेवारीवर आधारित गणित काय सांगतय, वाचा सविस्तर
- Gold Rate Today: सोन्याच्या दरात मोठी उलथापालथ; खरेदीपूर्वी पाहा सांगली, पुण्यासह PNG चे आजचे दर (२७ ऑक्टोबर २०२६)
- Maharashtra Weather: राज्यात उन्हाचा चटका वाढला, पारा ३६ पार; ‘या’ ३ जिल्ह्यांत वादळी पावसाचा इशारा, पाहा आजचा हवामान अंदाज
