सांगली टुडे शेती विशेष वृत्त: कमी पावसामुळे निर्माण झालेली पाणीटंचाई आणि दुष्काळसदृश परिस्थितीचा सामना करणाऱ्या सांगली जिल्ह्यातील शेतकऱ्यांसाठी दिलासादायक बातमी आहे. रब्बी हंगामात ज्वारी पिकाच्या लागवडीला प्रोत्साहन देण्यासाठी आणि जनावरांच्या चाऱ्याची टंचाई भासू नये म्हणून शासनामार्फत शेतकऱ्यांना १०० टक्के अनुदानावर रब्बी ज्वारी बियाण्यांचे मोफत वाटप करण्यात येणार आहे. सांगली जिल्ह्यासाठी १८ हजार १० मिनिकीटचे उद्दिष्ट मंजूर झाले असून पात्र शेतकऱ्यांनी १० नोव्हेंबर २०२६ पूर्वी महाडीबीटी वर ऑनलाइन अर्ज करावेत, असे आवाहन जिल्हा अधीक्षक कृषी अधिकारी विवेक कुंभार यांनी केले आहे.
सांगली जिल्ह्यासाठी ७२० क्विंटल बियाणे उपलब्ध
जिल्ह्यात सद्यस्थितीत निर्माण झालेल्या पाणीटंचाईचा शेती उत्पादनावर प्रतिकूल परिणाम होऊ नये, यासाठी कमी पाण्यात हमखास येणारे तृणधान्य व महत्त्वाचे चारा पीक म्हणून रब्बी ज्वारीची लागवड वाढवण्यावर भर दिला जात आहे. केंद्र शासनाने २०२६-२७ या वर्षात प्रथमच हा विशेष कार्यक्रम हाती घेतला आहे.
या योजनेअंतर्गत सांगली जिल्ह्यासाठी प्रत्येकी ४ किलो वजनाचे १८ हजार १० मिनिकीट, म्हणजेच एकूण ७२०.४० क्विंटल बियाणे उपलब्ध करून दिले जाणार आहे. हे बियाणे शेतकऱ्यांना पूर्णपणे मोफत (१००% अनुदानावर) दिले जाईल.
महाडीबीटीवर ‘प्रथम येणाऱ्यास प्रथम प्राधान्य’
या मोफत बियाणे वाटपासाठी लाभार्थ्यांची निवड पूर्णपणे पारदर्शक पद्धतीने केली जाणार आहे. महाडीबीटी (MahaDBT) शेतकरी पोर्टलवर नोंदणी करणाऱ्या शेतकऱ्यांमधून ‘प्रथम येणाऱ्यास प्रथम प्राधान्य’ (FCFS) या तत्त्वावर बियाणे मंजूर केले जाईल. त्यामुळे बियाण्यांचा कोटा संपण्यापूर्वी जिल्ह्यातील जास्तीत जास्त शेतकऱ्यांनी लवकरात लवकर अर्ज सादर करणे आवश्यक आहे.
चारा आणि अन्नधान्य सुरक्षिततेसाठी महत्त्वाचे पाऊल
कमी पावसाच्या काळात ज्वारी हे पीक दुष्काळी भागात तग धरून चांगले उत्पादन देते. शिवाय, या पिकापासून जनावरांसाठी दर्जेदार वैरण (कडबा) उपलब्ध होते. दुष्काळाच्या काळात ग्रामीण भागात पशुधनाला चाऱ्याची चणचण भासू नये आणि शेतकऱ्यांचे आर्थिक नुकसान टळावे, हा या मोहिमेमागील मुख्य उद्देश असल्याचे कृषी विभागाने प्रसिद्धीपत्रकात स्पष्ट केले आहे.
More Read
