सांगली : आरेवाडी येथील प्रसिद्ध श्री बिरोबा देवालय पर्यटन विकासासाठी तब्बल ₹149 कोटी 75 लाखांच्या सुधारित बृहत आराखड्यास जिल्हास्तरीय बैठकीत मंजुरी देण्यात आली. राज्याचे उच्च व तंत्र शिक्षण मंत्री तथा सांगलीचे पालकमंत्री चंद्रकांत पाटील यांच्या अध्यक्षतेखाली ही बैठक पार पडली.
प्रादेशिक पर्यटन विकास योजनेंतर्गत हा आराखडा मंजूर करण्यात आला असून पुढील मंजुरीसाठी राज्य शासनाकडे प्रस्ताव पाठवण्याच्या सूचना पालकमंत्र्यांनी दिल्या. या बैठकीला खासदार विशाल पाटील, आमदार सुधीर गाडगीळ, आमदार गोपीचंद पडळकर यांच्यासह वरिष्ठ अधिकारी उपस्थित होते.
बिरोबा देवस्थान येथे पश्चिम महाराष्ट्रासह कर्नाटक आणि आंध्र प्रदेशातून मोठ्या प्रमाणावर भाविक दर्शनासाठी येतात. यात्रा काळात सुमारे दीड ते दोन लाख भाविक दोन दिवस मुक्काम करतात. त्यामुळे येथे मोठ्या प्रमाणावर पर्यटन व पायाभूत सुविधा उभारण्याचा निर्णय घेण्यात आला आहे.
या आराखड्यात डॉरमेटरी भक्त निवास, सामान्य सुविधा केंद्र, प्रशासकीय इमारती, दुकानगाळे, पार्किंग, मुख्य मंदिर दुरुस्ती, रस्ते, सांडपाणी व्यवस्थापन, पावसाचे पाणी संकलन, विद्युत व्यवस्था, अग्निशमन प्रणाली आणि भूमी विकास कामांचा समावेश आहे.
यापूर्वी 2010 ते 2018 या कालावधीत सुमारे ₹8 कोटींची कामे पूर्ण झाली आहेत. तर 2024-25 मध्ये ‘ब’ वर्ग तीर्थक्षेत्र योजनेंतर्गत ₹3.98 कोटींची दोन कामे मंजूर झाली असून त्यांची कार्यवाही सुरू आहे. नवीन आराखड्यामुळे आरेवाडी हे मोठे धार्मिक पर्यटन केंद्र म्हणून विकसित होण्याची अपेक्षा व्यक्त केली जात आहे.
