Rabbi Pik Vima 2026: सांगलीसह तीन जिल्ह्यांसाठी सुधारित योजना जाहीर; ३० नोव्हेंबरपर्यंत मुदत, असा घ्या लाभ

सांगली (सांगली टुडे वृत्तसेवा): रब्बी हंगाम २०२६-२७ अंतर्गत सांगली, सातारा आणि कोल्हापूर जिल्ह्यांत सुधारित प्रधानमंत्री पीक विमा योजना लागू करण्यात आली आहे. नैसर्गिक आपत्तीमुळे पिकांचे होणारे संभाव्य नुकसान टाळण्यासाठी आणि शेतकऱ्यांना आर्थिक स्थैर्य देण्यासाठी जास्तीत जास्त शेतकऱ्यांनी या विमा योजनेत सहभागी व्हावे, असे आवाहन कोल्हापूर विभागाचे विभागीय कृषी सहसंचालक जालिंदर पांगरे यांनी प्रसिद्धीपत्रकाद्वारे केले आहे.

Contents

जिल्हानिहाय अधिसूचित पिके आणि विमा कंपन्या:
अर्ज करण्याची अंतिम मुदत:
नुकसान भरपाई कशी मिळणार?
आवश्यक कागदपत्रे आणि अर्ज कुठे करावा?

ही योजना कर्जदार आणि बिगर कर्जदार अशा सर्व शेतकऱ्यांसाठी ऐच्छिक आहे. खातेदार शेतकऱ्यांशिवाय कुळाने किंवा भाडेपट्टीने शेती करणारे शेतकरीदेखील या योजनेचा लाभ घेण्यास पात्र असतील. योजनेतील सर्व अधिसूचित पिकांसाठी जोखीमस्तर ७० टक्के निश्चित करण्यात आला आहे.

जिल्हानिहाय अधिसूचित पिके आणि विमा कंपन्या:

सांगली जिल्हा: रब्बी ज्वारी (बागायत व जिरायत), गहू (बागायत), हरभरा आणि उन्हाळी भुईमूग. (कार्यान्वयीन विमा कंपनी: बजाज अलायन्झ जनरल इन्शुरन्स कंपनी लि.)
सातारा जिल्हा: रब्बी ज्वारी (बागायत व जिरायत), गहू (बागायत), हरभरा, रब्बी कांदा आणि उन्हाळी भुईमूग. (कार्यान्वयीन कंपनी: एचडीएफसी इर्गो जनरल इन्शुरन्स कंपनी लि.)
कोल्हापूर जिल्हा: रब्बी ज्वारी (जिरायत), गहू (बागायत), हरभरा आणि उन्हाळी भुईमूग. (कार्यान्वयीन कंपनी: युनायटेड इंडिया इन्शुरन्स कंपनी लि.)

अर्ज करण्याची अंतिम मुदत:

रब्बी ज्वारी: ३० नोव्हेंबर २०२६
इतर रब्बी पिके (गहू, हरभरा, कांदा): १५ डिसेंबर २०२६
उन्हाळी भुईमूग: ३१ मार्च २०२७

नुकसान भरपाई कशी मिळणार?

पीक पेरणीपासून काढणीपर्यंतच्या कालावधीत नैसर्गिक आपत्ती किंवा उत्पादनावर विपरीत परिणाम करणाऱ्या घटकांमुळे होणाऱ्या नुकसानीची भरपाई दिली जाईल. हंगामाच्या अखेरीस महसूल मंडळानिहाय पीक कापणी प्रयोगांच्या (तांत्रिक उत्पादनाच्या) आधारे उंबरठा उत्पादनातील घट लक्षात घेऊन भरपाईची रक्कम थेट निश्चित केली जाईल.

आवश्यक कागदपत्रे आणि अर्ज कुठे करावा?

योजनेत सहभागी होण्यासाठी शेतकऱ्यांनी विहित नमुन्यातील अर्ज, शेतकरी ओळखपत्र क्रमांक (AGRISTACK Farmer ID), ई-पीक पाहणी, ओळख पडताळणी कागदपत्रे, ७/१२ उतारा, पेरणी स्वयंघोषणापत्र, बँक पासबुक प्रत आणि भाडेतत्त्वावर शेती असल्यास संमतीपत्र सोबत ठेवणे आवश्यक आहे.

शेतकरी आपल्या नजीकच्या बँक शाखा, प्राथमिक कृषी पतपुरवठा सहकारी संस्था (PACS), संबंधित विमा कंपनीचे कार्यालय किंवा ‘आपले सरकार सेवा केंद्र’ (CSC) येथे जाऊन अर्ज करू शकतात. याशिवाय अधिकृत पीक विमा पोर्टलवर (www.pmfby.gov.in) ऑनलाइन पद्धतीनेही अर्ज सादर करता येईल. अधिक माहितीसाठी क्षेत्रीय कृषी अधिकारी किंवा विमा प्रतिनिधींशी संपर्क साधावा.

📢 महाराष्ट्रातील नवीन सरकारी योजना, शासन निर्णय (GR), हवामान अंदाज, शेतमाल बाजारभाव आणि राज्यातील महत्त्वाच्या घडामोडींसाठी Sangli Today ला Google वर प्राधान्य असलेले स्रोत म्हणून जोडा.👇