सांगली : शिराळा तालुक्यातील बिऊर गावात गुरुवारी संध्याकाळी घडलेल्या हृदयद्रावक घटनेत बिबट्याच्या हल्ल्यात चार वर्षांचा चिमुरडा ठार झाला. घराच्या अंगणात मित्रांसोबत खेळत असलेल्या राजवीर पाटील (वय ४) याच्यावर दबा धरून बसलेल्या बिबट्याने अचानक झडप घातली. या घटनेनंतर संपूर्ण परिसरात भीतीचे वातावरण पसरले असून संतप्त ग्रामस्थांनी शिराळ्यातील वनविभागाच्या कार्यालयाची तोडफोड केली.
मिळालेल्या माहितीनुसार, राजवीर अंगणात खेळत असताना बिबट्याने त्याला जबड्यात पकडून फरफटत नेण्याचा प्रयत्न केला. सोबतच्या मुलांनी व कुटुंबीयांनी आरडाओरडा केल्यानंतर बिबट्याने मुलाला सोडून जंगलाच्या दिशेने पळ काढला. गंभीर जखमी अवस्थेत राजवीरला तातडीने ग्रामीण रुग्णालयात दाखल करण्यात आले; मात्र डॉक्टरांनी त्याला मृत घोषित केले.
या घटनेची माहिती कळताच गावकऱ्यांचा संताप उफाळून आला. परिसरात अनेक दिवसांपासून बिबट्याचा वावर असतानाही वनविभागाकडून ठोस उपाययोजना करण्यात आल्या नाहीत, असा आरोप करत संतप्त जमावाने शिराळ्यातील वनविभागाच्या कार्यालयावर हल्ला केला. कार्यालयातील काचा, फर्निचर व साहित्याची मोठ्या प्रमाणावर तोडफोड करण्यात आली.
ग्रामीण रुग्णालय परिसरात नागरिकांची मोठी गर्दी होत असल्याचे पाहून परिस्थिती नियंत्रणात ठेवण्यासाठी पोलिसांनी तातडीने बंदोबस्त तैनात केला. ग्रामस्थांनी बिबट्याला तात्काळ जेरबंद करण्यासाठी पिंजरे लावावेत तसेच मृत मुलाच्या कुटुंबाला तातडीची आर्थिक मदत द्यावी, अशी मागणी केली आहे.
हेही वाचा: सांगलीतील अनुसूचित जातीच्या शेतकऱ्यांसाठी मोठी संधी! विहीर, पंप, सोलर व सिंचनासाठी लाखोंचे अनुदान.
- तासगाव फाट्याजवळ टेम्पोने अचानक वळण घेतल्याने अपघात; आयशर टेम्पोखाली सापडून दुचाकीस्वार गंभीर जखमी
- सांगली पेठभाग भाजी मंडईतील ₹20.50 लाखांचा काँक्रिट रस्ता 6 महिन्यांत पूर्ण होणार का? नागरिकांचे लक्ष
- सांगली पोलीस भरती 2024-25; 737 उमेदवार लेखी परीक्षेस पात्र, अधिकृत यादी जाहीर
- गंभीर गुन्ह्यांच्या पार्श्वभूमीवर जत तालुक्यातील हिप्परकर टोळी तडिपार; सांगली-सोलापूर जिल्ह्यात प्रवेशबंदी
- भिलवडीजवळ अज्ञात वाहनाच्या धडकेत दुचाकीस्वाराचा मृत्यू; वाहनचालक फरार
- एनओसीवरून वाद पेटला; सांगलीत वकिलाच्या घरात घुसून धमकी, चौघांवर गुन्हा
