सांगली: सांगलीचे भाजप आमदार सुधीर गाडगीळ यांच्या मोटारीचा शनिवारी दुपारी मिरज तालुक्यातील वड्डीजवळ अपघात झाला. दुचाकीस्वाराने अचानक यू-टर्न घेतल्याने झालेल्या धडकेत मोटारीधील एअरबॅग तात्काळ उघडल्यामुळे मोठा अनर्थ टळला. या अपघातात आमदार गाडगीळ यांच्या हाताच्या बोटाला किरकोळ दुखापत झाली असून दुचाकीस्वार जखमी झाला आहे.
मिळालेल्या माहितीनुसार, आमदार सुधीर गाडगीळ कर्नाटकातील उगार येथून सांगलीकडे परत येत होते. रत्नागिरी-नागपूर महामार्गावरील वड्डी ते कृष्णा घाट सर्व्हीस रस्त्यावर एका दुचाकीस्वाराने अचानक यू-टर्न घेतल्याने चालकाने दुचाकीस्वाराला वाचवण्याचा प्रयत्न केला. मात्र दुचाकी मोटारीला धडकली.
धडकेची तीव्रता मोठी असल्याने मोटारीमधील एअरबॅग तात्काळ उघडल्या. त्यामुळे मोटारीधील सर्वजण सुरक्षित बचावले. आमदार गाडगीळ यांच्या बोटाला किरकोळ दुखापत झाली असून त्यांच्यासोबत असलेले स्वीय सहायक, अंगरक्षक, छायाचित्रकार आणि चालक यांना कोणतीही दुखापत झाली नाही.
अपघातात जखमी झालेल्या दुचाकीस्वाराला तातडीने १०८ रुग्णवाहिकेतून मिरज शासकीय रुग्णालयात उपचारासाठी दाखल करण्यात आले. अपघाताची माहिती मिळताच पोलिस आणि महामार्ग पोलिसांनी घटनास्थळी धाव घेऊन वाहतूक सुरळीत केली. प्राथमिक उपचारानंतर आमदार सुधीर गाडगीळ आपल्या निवासस्थानी परतले.
