सांगली टुडे हवामान विशेष: राज्यात एका बाजूला ऑक्टोबर हिटचा कडक चटका आणि दुपारचा असह्य उकाडा कायम असतानाच आता हवामानात मोठा बदल होणार आहे. बंगालच्या उपसागरात निर्माण झालेले ‘अर्णब’ चक्रीवादळ आता अत्यंत तीव्र झाले असून ते आंध्र प्रदेशच्या किनारपट्टीकडे वेगाने सरकत आहे. या चक्रीवादळाच्या प्रभावामुळे महाराष्ट्रातील हवामान झपाट्याने बदलत असून, उद्या बुधवार २८ ऑक्टोबर रोजी पूर्व विदर्भाला पावसाचा जोरदार तडाखा बसण्याची शक्यता हवामान विभागाने वर्तवली आहे.
गडचिरोलीला ऑरेंज अलर्ट, विदर्भात मुसळधार पावसाचा इशारा
चक्रीवादळाचा थेट प्रभाव पूर्व विदर्भातील जिल्ह्यांवर दिसून येणार आहे. हवामान विभागाने उद्या २८ ऑक्टोबरसाठी गडचिरोली जिल्ह्याला ‘ऑरेंज अलर्ट’ जारी केला असून येथे मेघगर्जनेसह अतिमुसळधार पावसाचा इशारा देण्यात आला आहे.
याशिवाय चंद्रपूर, भंडारा आणि गोंदिया या जिल्ह्यांना ‘येलो अलर्ट’ देण्यात आला असून नागपूर, वर्धा आणि यवतमाळ जिल्ह्यांत वादळी वाऱ्यासह विजांचा कडकडाट होण्याची दाट शक्यता आहे. ऐन दिवाळीच्या खरेदीत आणि शेतातील काढणीच्या हंगामात हा पाऊस होणार असल्याने विदर्भातील शेतकऱ्यांची चिंता वाढली आहे.
पश्चिम महाराष्ट्र, मराठवाड्यात काय परिस्थिती असणार?
विदर्भाबाहेरील उर्वरित महाराष्ट्रात दुपारच्या वेळी कडक ऊन आणि उकाडा जाणवत असला, तरी काही भागांत स्थानिक वातावरणातील बदलांमुळे हलक्या सरी कोसळू शकतात.
- पश्चिम महाराष्ट्र: सांगली आणि सातारा जिल्ह्यांच्या काही घाटमाथ्यांवर दुपारनंतर ढगाळ वातावरण तयार होऊन तुरळक ठिकाणी मेघगर्जनेसह हलका पाऊस पडू शकतो. कोल्हापूर आणि घाटमाथ्यावरही अशीच स्थिती राहण्याचा अंदाज आहे.
- मराठवाडा व उत्तर महाराष्ट्र: नांदेड, हिंगोली, परभणी, लातूर, धाराशिव तसेच उत्तर महाराष्ट्रातील जळगाव, धुळे आणि नाशिकच्या घाटमाथ्यावर विजांच्या कडकडाटासह हलक्या सरींची शक्यता वर्तवण्यात आली आहे.
- कोकण: रत्नागिरी आणि सिंधुदुर्गच्या किनारपट्टीवर हवामान प्रामुख्याने दमट राहील, मात्र काही ठिकाणी हलक्या सरी हजेरी लावू शकतात.
‘अर्णब’ चक्रीवादळ उद्या किनारपट्टीला धडकणार
हवामान खात्याच्या ताज्या बुलेटिननुसार, हे चक्रीवादळ सध्या पश्चिम-मध्य बंगालच्या उपसागरात सक्रिय आहे. उद्या २८ ऑक्टोबरच्या सकाळपर्यंत हे वादळ आंध्र प्रदेशातील बापटला ते विशाखापट्टणम दरम्यान, यानमजवळ किनारपट्टीला धडकण्याची शक्यता आहे. जमिनीवर धडकताना वादळी वाऱ्यांचा वेग ताशी १२५ ते १३५ किमी आणि कमाल १५० किमी प्रतितास राहू शकतो. या चक्रीवादळामुळे महाराष्ट्रातील पूर्वेकडील भागात पावसाचा जोर अधिक राहणार असल्याने विदर्भातील नागरिकांनी आणि शेतकऱ्यांनी योग्य खबरदारी घेण्याचे आवाहन करण्यात आले आहे.
More Read
