मुंबई/सांगली (सांगली टुडे वृत्तसेवा): बंगालच्या उपसागरात धडकलेल्या ‘मुरासू’ या तीव्र चक्रीवादळाचा थेट परिणाम आता महाराष्ट्राच्या वातावरणावर जाणवू लागला आहे. हे वादळ जमिनीवर आल्यानंतर आता हळूहळू निवळत असले, तरी राज्यातील अनेक भागांत पावसासाठी पोषक वातावरण तयार झाले आहे. आज, बुधवारी (४ नोव्हेंबर) कोकण, पश्चिम महाराष्ट्र आणि मराठवाड्यातील बहुतांश भागांत मेघगर्जनेसह विजांच्या कडकडाटात हलक्या ते मध्यम पावसाचा अंदाज भारतीय हवामान विभागाने (IMD) वर्तवला आहे.
ऐन दिवाळीच्या दिवसांत राज्याच्या तापमानात मोठे चढ-उतार पाहायला मिळत असून, एका बाजूला उन्हाचा चटका आणि दुसऱ्या बाजूला अचानक येणाऱ्या पावसाने शेतकऱ्यांसह सर्वसामान्यांची चिंता वाढवली आहे.
‘मुरासू’ चक्रीवादळाची सद्यस्थिती काय?
हवामान विभागाने दिलेल्या माहितीनुसार, बंगालच्या उपसागरात तयार झालेले ‘मुरासू’ हे तीव्र चक्रीवादळ मंगळवारी पहाटे आंध्र प्रदेशच्या किनारपट्टीवर ओंगोलजवळ जमिनीवर (Landfall) आले. त्यावेळी १०० ते ११० किमी प्रतितास वेगाने वारे वाहत होते. आता हे चक्रीवादळ उत्तरेकडे सरकताना हळूहळू निवळत असून, त्याचे रूपांतर कमी दाबाच्या क्षेत्रात होत आहे. याच प्रणालीमुळे महाराष्ट्राच्या दक्षिणेकडील आणि लगतच्या जिल्ह्यांत हवामानत बदल होत आहे.
विभागांनुसार हवामानाची स्थिती:
- पश्चिम महाराष्ट्र (सांगली, कोल्हापूर अलर्टवर): पश्चिम महाराष्ट्रात पुणे शहर आणि घाटमाथ्यावर हवामान प्रामुख्याने कोरडे राहण्याची शक्यता आहे. मात्र सांगली, कोल्हापूर, सातारा आणि सोलापूर या जिल्ह्यांत दुपारनंतर किंवा संध्याकाळी मेघगर्जनेसह विजांच्या कडकडाटात हलक्या ते मध्यम स्वरूपाच्या सरी कोसळू शकतात. सांगली जिल्ह्यातील शिराळा, कोकरूड, वाळवा या भागांत कालही हलक्या पावसाची नोंद झाली आहे.
- मराठवाडा (६ जिल्ह्यांत पावसाचा अंदाज): मराठवाड्यातील छत्रपती संभाजीनगर, जालना, परभणी, हिंगोली, नांदेड आणि लातूर या जिल्ह्यांमध्ये आज काही ठिकाणी विजांसह हलका पाऊस पडू शकतो. धाराशिव आणि बीड जिल्ह्यात मात्र हवामान कोरडे राहण्याची शक्यता आहे.
- कोकण किनारपट्टी: रत्नागिरी आणि सिंधुदुर्ग या दोन जिल्ह्यांत मेघगर्जनेसह पावसाचा अंदाज कायम आहे. दुसरीकडे मुंबई, ठाणे, पालघर आणि रायगड परिसरात पाऊस नसून हवामान प्रामुख्याने कोरडे राहील.
- उत्तर महाराष्ट्र आणि विदर्भ: नाशिक, धुळे, जळगाव आणि नंदुरबार तसेच संपूर्ण विदर्भातील नागपूर, अमरावती, चंद्रपूर, अकोला या भागात पावसाची शक्यता नसून हवामान कोरडे राहील. मात्र या भागात दिवसा उन्हाचा चटका आणि रात्री गारवा असा दुहेरी अनुभव नागरिकांना येत आहे.
एकाच वेळी उन्हाचा चटका अन् रात्री गारवा
राज्यातील तापमानात सध्या टोकाचे चढ-उतार दिसत आहेत. काल मंगळवारी सोलापूर येथे राज्यातील सर्वाधिक ३५.२ अंश सेल्सिअस तापमानाची नोंद झाली, तर रत्नागिरी (३४.९ अंश), अकोला (३४.९ अंश) आणि मुंबई सांताक्रूझ (३४.८ अंश) येथेही उन्हाचा तीव्र चटका जाणवला. याउलट पूर्व विदर्भातील भंडारा येथे पारा थेट १५ अंश सेल्सिअसपर्यंत घसरल्याने तिथे चांगलाच गारवा जाणवत आहे.
More Read
