सांगली टुडे फॅक्ट चेक विशेष: मुख्यमंत्री माझी लाडकी बहीण योजनेवरून सोशल मीडियावर सध्या अनेक दिशाभूल करणाऱ्या पोस्ट आणि रिल्सचा पूर आला आहे. काही कारणास्तव ज्या महिलांचे दरमहा मिळणारे हप्ते बंद झाले आहेत, त्यांना आता एकदम ४० हजार रुपये मिळणार असल्याचा एक दावा इन्स्टाग्रामवर प्रचंड वेगाने व्हायरल होत आहे. ऐन दिवाळीच्या काळात पैशांची गरज असल्याने अनेक महिला या दाव्याला बळी पडत असल्याचे निदर्शनास आले आहे. मात्र, हा संपूर्ण दावा पूर्णपणे खोटा आणि दिशाभूल करणारा असल्याचे महाराष्ट्र शासनाने स्पष्ट केले आहे.
इन्स्टाग्राम रीलद्वारे नेमका काय दावा केला जातोय?
सोशल मीडियावरील इन्स्टाग्राम रीलमध्ये असा प्रचार केला जात आहे की, ज्या महिलांचे लाडकी बहीण योजनेचे पैसे थांबले आहेत, त्यांनी एका ठरावीक लिंकवर जाऊन अर्ज केल्यास त्यांच्या खात्यात थेट ४० हजार रुपये जमा केले जातील. यासाठी महिलांना एका खाजगी वेबसाईटवर जाण्यास सांगितले जात आहे. तिथे गेल्यानंतर ओळखपत्रावरील नाव, मोबाईल नंबर, तालुका आणि गावाचे नाव यांसारखी संवेदनशील वैयक्तिक माहिती भरण्याचे आवाहन केले जात आहे.
शासनाने अशी कोणतीही घोषणा केलेली नाही (Fact Check)
महाराष्ट्र शासनाच्या माहिती व जनसंपर्क महासंचालनालयाने (DGIPR) या व्हायरल दाव्याची तात्काळ दखल घेत वस्तुस्थिती समोर आणली आहे.
- कोणतीही ४० हजारांची तरतूद नाही: राज्य शासनाने अशा कोणत्याही रकमेची किंवा बंद हप्त्यांच्या बदल्यात ४० हजार रुपये देण्याची कोणतीही घोषणा केलेली नाही.
- संशयास्पद संकेतस्थळ: ते महाराष्ट्र शासनाचे अधिकृत पोर्टल नसून ती एक पूर्णपणे खाजगी आणि अनधिकृत वेबसाईट आहे.
- माहितीचा गैरवापर होण्याचा धोका: अशा अनधिकृत आणि बनावट संकेतस्थळांवर आपला फोन नंबर, पत्ता किंवा ओळखपत्राची माहिती टाकल्यास सायबर फसवणूक होण्याचा आणि बँक खात्याशी संबंधित डेटा चोरीला जाण्याचा मोठा धोका संभवतो.
🔴 लेटेस्ट
अधिकृत माहिती कुठे पाहावी?
लाडकी बहीण योजनेशी संबंधित कोणत्याही अर्जाची स्थिती, नवीन सूचना किंवा नियमावली तपासण्यासाठी केवळ शासनाच्या अधिकृत संकेतस्थळालाच भेट द्यावी. शासनाचे अधिकृत पोर्टल ladakibahin.maharashtra.gov.in हे असून इतर कोणत्याही सोशल मीडिया रील किंवा अनोळखी लिंकवर विश्वास ठेवून आपली खाजगी माहिती देऊ नये, असे आवाहन प्रशासनामार्फत करण्यात आले आहे.
More Read
