सांगली (सांगली टुडे वृत्तसेवा): राज्य शासनाच्या पुण्यश्लोक अहिल्यादेवी होळकर शेतकरी कर्जमुक्ती योजनेअंतर्गत सांगली आणि कोल्हापूर जिल्ह्यातील शेतकऱ्यांच्या खात्यावर कोट्यवधी रुपयांची रक्कम वर्ग करण्यात आली आहे. योजनेच्या चौथ्या टप्प्यात या दोन्ही जिल्ह्यांतील हजारो पात्र शेतकऱ्यांच्या बँक खात्यांवर एकंदर ७६ कोटी रुपयांहून अधिक निधी जमा करण्यात आला असून, ऐन सणासुदीच्या काळात या निर्णयामुळे शेतकरी कुटुंबांना आर्थिक दिलासा मिळाला आहे. दोन्ही जिल्हा माहिती कार्यालयांकडून या संदर्भातील अधिकृत आकडेवारी जाहीर करण्यात आली आहे.
या चौथ्या टप्प्यात सांगली जिल्ह्यातील शेतकऱ्यांच्या कर्जखात्यांवर सर्वाधिक ५५ कोटी ४८ लाख रुपयांचे वाटप पूर्ण झाले आहे. यामध्ये सांगली जिल्हा मध्यवर्ती सहकारी बँकेमार्फत ४५ कोटी ३८ लाख रुपये, तर राष्ट्रीयीकृत बँकांमार्फत १० कोटी १० लाख रुपयांचा निधी शेतकऱ्यांच्या खात्यावर जमा करण्यात आला आहे. सांगली जिल्ह्यातील जिल्हा बँकेचे ८ हजार ३१८ आणि राष्ट्रीयीकृत बँकांचे १६६ अशा एकूण ८ हजार ४८४ शेतकऱ्यांचा समावेश या चौथ्या यादीत करण्यात आला होता. प्रत्यक्ष वितरणामध्ये सांगली जिल्हा बँकेच्या ७ हजार ३६७ आणि राष्ट्रीयीकृत बँकांमधील ९११ शेतकऱ्यांना हा थेट लाभ मिळाला आहे.
हेही वाचा: शेतकऱ्यांना दिलासा: १०० टक्के अनुदानावर चारा बियाणे; पात्रता, अटी आणि अर्जाची सोपी पद्धत जाणून घ्या.
दुसरीकडे कोल्हापूर जिल्ह्यामध्येही कर्जमुक्तीच्या चौथ्या टप्प्याचे वितरण पूर्ण झाले असून, जिल्ह्यासाठी २१ कोटी रुपयांचा विशेष निधी उपलब्ध करून देण्यात आला आहे. कोल्हापूर जिल्हा मध्यवर्ती सहकारी बँक अर्थात केडीसीसी बँक आणि राष्ट्रीयीकृत बँकांच्या माध्यमातून हा निधी २ हजार ७५० शेतकऱ्यांच्या कर्जखात्यावर वर्ग करण्यात आला आहे. दोन्ही जिल्ह्यांमध्ये मिळून तब्बल ११ हजारांपेक्षा जास्त शेतकरी कुटुंबांचे थकीत कर्ज या टप्प्यात माफ झाले आहे.
सांगली जिल्ह्यात पहिल्या यादीतून १५६ कोटी ५४ लाख, दुसऱ्या यादीतून ६७ कोटी २५ लाख, तर तिसऱ्या यादीतून १५ कोटी ४६ लाख रुपयांचे वितरण झाले होते. आता चौथ्या टप्प्यातील ५५ कोटी ४८ लाखांची भर पडल्याने एकट्या सांगली जिल्ह्यात आतापर्यंत तब्बल २९४ कोटी ७३ लाख रुपयांचा एकूण कर्जमुक्ती लाभ पोहोचला आहे. तर कोल्हापूर जिल्ह्यातही केडीसीसी बँकेच्या माध्यमातून शेतकऱ्यांची कर्जखाती पूर्ववत करण्यात येत आहेत.
📢 महाराष्ट्रातील नवीन सरकारी योजना, शासन निर्णय (GR), हवामान अंदाज, शेतमाल बाजारभाव आणि राज्यातील महत्त्वाच्या घडामोडींसाठी Sangli Today ला Google वर प्राधान्य असलेले स्रोत म्हणून जोडा.👇
ताज्या बातम्या
