सांगली : सांगली जिल्ह्यातील वाळवा तालुक्यातील येडेनिपाणी परिसरात शनिवारी सकाळी बिबट्याचा वावर पुन्हा एकदा ग्रामस्थांच्या निदर्शनास आला. एका शेतातील नारळाच्या झाडावरून बिबट्या खाली उतरत असताना काही नागरिकांनी त्याला पाहिल्याने परिसरात भीतीचे वातावरण निर्माण झाले आहे.
मिळालेल्या माहितीनुसार, जोतिबा खिंड परिसरात उत्तम पाटील यांच्या शेतात सकाळच्या सुमारास नारळाच्या झाडावर बिबट्या चढलेला असल्याचे काही ग्रामस्थांच्या लक्षात आले. काही वेळातच बिबट्या झाडावरून खाली उतरताना दिसून आला. या घटनेनंतर स्थानिक नागरिकांनी सावधगिरीचा इशारा देत इतरांना माहिती दिली. काही नागरिकांनी या घटनेचे मोबाईलवर चित्रिकरणही केल्याचे सांगितले जात आहे.
येडेनिपाणी परिसर डोंगराळ भाग, दाट झाडी आणि ऊस शेतीने वेढलेला असल्यामुळे बिबट्याचा अधिवास वाढल्याचे स्थानिकांचे म्हणणे आहे. गेल्या महिनाभरात या भागात बिबट्याचा तसेच त्याच्या पिलांचा वावर वारंवार दिसून आल्याची माहिती ग्रामस्थांकडून देण्यात आली आहे. काही दिवसांपूर्वी रात्रीच्या वेळी याच परिसरात तरस दिसल्याचेही सांगण्यात आले.
बिबट्याच्या सततच्या दर्शनामुळे शेतकरी व नागरिकांमध्ये भीतीचे वातावरण असून, विशेषतः रात्रीच्या वेळी शेतात जाण्याचे शेतकरी टाळत आहेत. ऊसतोड सुरू असल्याने फड मोकळे होत असून, त्यामुळे वन्यप्राणी नागरी वस्तीच्या दिशेने येत असल्याची शक्यता वर्तवली जात आहे.
या पार्श्वभूमीवर, येडेनिपाणी परिसरातील नागरिकांनी वन विभागाने तातडीने उपाययोजना कराव्यात, बिबट्याच्या हालचालींवर लक्ष ठेवावे तसेच आवश्यक असल्यास पिंजरा लावून बिबट्याला जेरबंद करावे, अशी मागणी केली आहे.
हेही वाचा: गाव पातळीवर प्लास्टिक कचऱ्याचा प्रश्न सुटणार? कवठेपिरानमधील नवा प्रकल्प चर्चेत.
- तासगाव फाट्याजवळ टेम्पोने अचानक वळण घेतल्याने अपघात; आयशर टेम्पोखाली सापडून दुचाकीस्वार गंभीर जखमी
- सांगली पेठभाग भाजी मंडईतील ₹20.50 लाखांचा काँक्रिट रस्ता 6 महिन्यांत पूर्ण होणार का? नागरिकांचे लक्ष
- सांगली पोलीस भरती 2024-25; 737 उमेदवार लेखी परीक्षेस पात्र, अधिकृत यादी जाहीर
- गंभीर गुन्ह्यांच्या पार्श्वभूमीवर जत तालुक्यातील हिप्परकर टोळी तडिपार; सांगली-सोलापूर जिल्ह्यात प्रवेशबंदी
- भिलवडीजवळ अज्ञात वाहनाच्या धडकेत दुचाकीस्वाराचा मृत्यू; वाहनचालक फरार
- एनओसीवरून वाद पेटला; सांगलीत वकिलाच्या घरात घुसून धमकी, चौघांवर गुन्हा
