Fraud Case Sangli : पन्हाळा तालुक्यातील काखे येथील तरुणाची वन विभागात नोकरी लावून देण्याचे आमिष दाखवत तब्बल 18 लाख रुपयांची फसवणूक केल्याचा धक्कादायक प्रकार उघडकीस आला आहे. या प्रकरणी वाळवा (जि. सांगली) येथील शिवाजी बाळकृष्ण अहिर याच्यावर कोडोली पोलिस ठाण्यात फसवणुकीचा गुन्हा दाखल झाला आहे.
काखे येथील राजश्री संभाजी पाटील यांनी दाखल केलेल्या फिर्यादीनुसार, फिर्यादी आणि आरोपी हे एकाच गावातील असल्याने त्यांच्यात ओळख होती. या ओळखीचा गैरफायदा घेत शिवाजी अहिर याने राजश्री पाटील यांना त्यांच्या मुलाला वन विभागात नोकरी लावून देण्याचे आश्वासन दिले.
नोकरी लावण्यासाठी 18 लाख रुपये लागतील असे सांगून 2022 पासून टप्प्याटप्प्याने आरोपीने ही रक्कम स्वीकारली. अनेक महिने उलटूनही नोकरीची काहीही प्रक्रिया न झाल्याने पाटील यांनी पैसे परत मागितले. मात्र, आरोपीने रक्कम परत देण्यास नकार दिल्याने फसवणूक उघड झाली.
या प्रकरणी कोडोली पोलिसांनी गुन्हा दाखल झाला असून पुढील तपासाची जबाबदारी सहायक पोलिस निरीक्षक कैलास कोडग यांच्याकडे दिली आहे.
हेही वाचा: ट्रकच्या भीषण धडकेत दुचाकीस्वाराचा मृत्यू तर एक जखमी, चालक फरार.
