सांगली टुडे हवामान विशेष: राज्यात सध्या एकाच वेळी दोन ऋतूंचा अनुभव येत असून दुपारच्या वेळी ऑक्टोबर हिटचा कडक चटका आणि पहाटे हलका गारठा अशी संमिश्र स्थिती निर्माण झाली आहे. बहुतांश जिल्ह्यांमध्ये कमाल तापमानाने पस्तिशी ओलांडली असून उकाड्याने नागरिक हैराण झाले आहेत. अशातच बंगालच्या उपसागरात सक्रिय असलेल्या चक्रीवादळ सदृश प्रणालीमुळे राज्यातील हवामानात उलथापालथ सुरू झाली असून काही जिल्ह्यांमध्ये विजांच्या कडकडाटासह वादळी पावसाचा इशारा देण्यात आला आहे.
पूर्व विदर्भात वादळी पावसाची शक्यता (IMD Yellow Alert)
हवामान विभागाने दिलेल्या माहितीनुसार, बंगालच्या उपसागरात निर्माण झालेली चक्रीवादळाची स्थिती आणि दक्षिण किनारपट्टीजवळ सक्रिय असलेला कमी दाबाचा पट्टा यामुळे पूर्वेकडील भागात पावसासाठी पोषक वातावरण तयार झाले आहे. आज २७ ऑक्टोबर रोजी पूर्व विदर्भातील यवतमाळ, चंद्रपूर आणि गडचिरोली या जिल्ह्यांमध्ये विजांच्या कडकडाटासह वादळी पावसाचा अंदाज वर्तवण्यात आला असून तेथे येलो अलर्ट लागू करण्यात आला आहे. उद्यापासून या भागात पावसाचा जोर आणखी वाढण्याची शक्यता हवामान तज्ज्ञांनी वर्तवली आहे.
पश्चिम महाराष्ट्र आणि उर्वरित भागात उन्हाचा चटका
विदर्भातील काही जिल्हे वगळता उर्वरित संपूर्ण महाराष्ट्रात मात्र कोरडे आणि उष्ण हवामान कायम राहणार आहे. पश्चिम महाराष्ट्रातील सांगली, कोल्हापूर, सातारा, पुणे आणि सोलापूर या भागात पावसाची शक्यता नसून दिवसभर कडक ऊन पडण्याचा अंदाज आहे. विशेषतः सोलापूर आणि सांताक्रूझ येथे पारा ३६.५ अंशांच्या पुढे गेल्याने प्रचंड उकाडा जाणवत आहे. सांगलीत कमाल तापमान ३४.२ अंश नोंदवले गेले असून हवेतील कोरडेपणामुळे दुपारच्या वेळी उन्हाचे चटके अधिक तीव्र भासत आहेत. उत्तर महाराष्ट्र आणि मराठवाड्यातही आकाश प्रामुख्याने निरभ्र राहून हवामान पूर्णपणे कोरडे राहील.
पहाटे गारठा तर दुपारी उकाडा
राज्यात दिवसा कडक ऊन तापत असले तरी किमान तापमानात हळूहळू घट होताना दिसत आहे. पहाटेच्या वेळी हवेत गारवा जाणवत असून काही भागांत हलके धुके पाहायला मिळत आहे. धुळ्यात नीचांकी १३ अंश सेल्सिअस तापमानाची नोंद झाली आहे. मात्र दुपारच्या वेळी वाढणारे तापमान शेतीतील उभ्या पिकांसाठी आणि नागरिकांच्या आरोग्यासाठी डोकेदुखी ठरत आहे.
More Read
