आष्टा : वाळवा येथील एका डॉक्टरला ऑनलाईन शेअर मार्केटमधून मोठा नफा मिळवून देण्याचे आमिष दाखवून तब्बल 14 लाख 30 हजार रुपयांची फसवणूक केल्याची घटना उघड झाली आहे. या प्रकरणी आष्टा पोलिसांत गुन्हा दाखल झाला असून पुढील तपास सुरू आहे.
मिळालेल्या माहितीनुसार, डॉ. अनिल चंद्रकांत खुंटाळे (वय 52) यांनी मोबाईलवर आलेल्या लिंक आणि संदेशांवर विश्वास ठेवून गुंतवणूक केली होती. सुरुवातीला कमी रक्कम गुंतवल्यानंतर काही परतावा दाखवण्यात आला. त्यामुळे त्यांचा विश्वास बसला. त्यानंतर व्हॉट्सॲप कॉल आणि मेसेजद्वारे त्यांना वारंवार अधिक पैसे गुंतवण्यास प्रवृत्त करण्यात आले.
विविध बँक खात्यांमध्ये त्यांनी एकूण १४ लाख ३० हजार रुपये भरले. मात्र काही दिवसांनी संबंधित कंपनीचा संपर्क क्रमांक व वेबसाईट बंद करण्यात आली. त्यामुळे आपण फसवणुकीला बळी पडलो असल्याचे डॉक्टरांच्या लक्षात आले. अखेर त्यांनी आष्टा पोलिस ठाण्यात आपली फसवणूक झाल्याबाबत तक्रार नोंदवली.
या प्रकरणी संबंधित संशयितांवर माहिती तंत्रज्ञान कायद्यांतर्गत गुन्हा दाखल करण्यात आला आहे. पोलिसांकडून पुढील तपास सुरू आहे.
हेही वाचा: MPSC परीक्षा पुढे ढकलण्याची मागणी; विद्यार्थ्यांमध्ये चिंतेचे वातावरण.
📍 तालुक्यातील आणखी बातम्या 📍
