सांगली (सांगली टुडे वृत्तसेवा): दिवाळीचा सण सरताच नोव्हेंबरच्या मध्यावर महाराष्ट्राच्या हवामानात मोठा आणि स्पष्ट बदल जाणवू लागला आहे. उत्तरेकडील थंड वाऱ्यांच्या प्रवाहाचा परिणाम राज्यातील तापमानावर होत असल्याने राज्यात सध्या ‘दुहेरी हवामानाचा’ अनुभव येत आहे. भारतीय हवामान विभागाने (IMD) आज १२ नोव्हेंबर रोजी दिलेल्या ताज्या अंदाजानुसार, राज्यात दिवसा उन्हाचा कडाका जाणवत असला तरी रात्री आणि पहाटेच्या तापमानात २ ते ३ अंश सेल्सिअसची घट होऊन थंडीची हुडहुडी वाढणार आहे. पुढील चार ते पाच दिवस संपूर्ण राज्यात पावसाची कोणतीही शक्यता नसून हवामान प्रामुख्याने कोरडे राहणार आहे.
कोकण आणि मुंबईत उकाडा कायम
मुंबई, ठाणे, पालघर, रायगड, रत्नागिरी आणि सिंधुदुर्ग या कोकण पट्ट्यात नोव्हेंबर महिन्यातही उन्हाचा चटका कायम आहे. मुंबईच्या सांताक्रूझ वेधशाळेत ३६.१ अंश सेल्सिअस तर रत्नागिरीत ३६ अंश सेल्सिअस इतक्या उच्चांकी कमाल तापमानाची नोंद झाली आहे. कोकणात दिवसा कमाल तापमान ३३ ते ३५ अंश सेल्सिअसच्या आसपास राहील, मात्र संध्याकाळनंतर आणि पहाटे किमान तापमान १८ ते २० अंशांपर्यंत खाली येत असल्याने हवेत हळुवार गारवा जाणवेल.
पश्चिम महाराष्ट्रात पहाटेचा गारठा वाढणार
सांगली, कोल्हापूर, सातारा, पुणे आणि सोलापूर या पश्चिम महाराष्ट्रातील जिल्ह्यांमध्ये हवामान कोरडे राहण्याचा अंदाज हवामान विभागाने वर्तवला आहे. या भागात दिवसा उन्हाची तीव्रता जाणवत असली तरी कमाल तापमान २९ अंश सेल्सिअसच्या आसपास मर्यादित राहील, तर रात्री आणि पहाटे किमान तापमान १८ अंश सेल्सिअसपर्यंत घसरणार असल्याने ग्रामीण भागात पहाटे थंडीचा जोर अधिक जाणवेल.
मराठवाडा, विदर्भ आणि उत्तर महाराष्ट्रातील स्थिती
उत्तर महाराष्ट्रातील नाशिक, धुळे, जळगाव, नंदुरबार आणि अहिल्यानगर जिल्ह्यांत कमाल तापमान ३२ अंश तर किमान तापमान २१ अंश सेल्सिअस राहण्याची शक्यता असून रात्रीच्या गारठ्यात वाढ झाली आहे. दुसरीकडे मराठवाड्यात छत्रपती संभाजीनगर, जालना, बीड, लातूर, धाराशिव, परभणी, हिंगोली आणि नांदेड जिल्ह्यांत दिवसा उष्णता (कमाल ३५ अंश) राहील, तर रात्री तापमान २० अंशांपर्यंत खाली येईल. विदर्भातही नागपूर, अमरावती, अकोला, वर्धा, चंद्रपूरसह सर्वच जिल्ह्यांत कोरडे हवामान राहणार असून दिवसा कमाल तापमान ३४ अंश तर पहाटे किमान तापमान १८ अंशांपर्यंत घसरल्याने विदर्भाला थंडीची चाहूल लागली आहे.
हेही वाचा: आता एजंटशिवाय घरबसल्या काढा ड्रायव्हिंग लायसन्स; ‘आपले सरकार’ने जाहीर केले अधिकृत दर आणि कागदपत्रांची यादी.



