सांगली : सांगली शहरातील शामरावनगर परिसरात शुक्रवारी रात्री एका तरुणाचा चाकूहल्ल्यात मृत्यू झाल्याची घटना उघडकीस आली आहे. या प्रकरणी पूर्ववैमनस्यातून हल्ला झाल्याचा प्राथमिक अंदाज पोलिसांनी व्यक्त केला असून, संशयितांचा शोध घेण्यासाठी तपास सुरू करण्यात आला आहे.
मृत तरुणाचे नाव चैतन्य आप्पासाहेब तांदळे (वय 17, रा. रामनगर, कोल्हापूर रोड, सांगली) असे आहे. पोलिसांकडून मिळालेल्या माहितीनुसार, चैतन्य हा शुक्रवारी रात्री सुमारे 11 वाजण्याच्या सुमारास शामरावनगर भागात एका मित्रासोबत जात असताना, दबा धरून बसलेल्या तिघा अज्ञात व्यक्तींनी त्याच्यावर हल्ला केला.
हल्ल्याच्या वेळी चैतन्यसोबत असलेला अल्पवयीन मित्र घटनास्थळावरून पळून गेला. चैतन्य गंभीर जखमी अवस्थेत आढळून आला. त्याला तातडीने रुग्णालयात हलवण्याचा प्रयत्न करण्यात आला; मात्र उपचारापूर्वीच त्याचा मृत्यू झाल्याचे डॉक्टरांनी घोषित केले.
पूर्ववैमनस्याचा संशय; तपास सुरू
पोलिस तपासात चैतन्य आणि संशयितांमध्ये काही दिवसांपूर्वी वाद झाल्याची माहिती समोर आली असून, त्याच पार्श्वभूमीवर हा हल्ला झाल्याचा संशय व्यक्त करण्यात येत आहे. या प्रकरणी तिघा संशयितांची ओळख पटवण्यात आली असून, त्यांना ताब्यात घेण्यासाठी सांगली शहर पोलीस व स्थानिक गुन्हे शाखेची पथके कार्यरत आहेत.
घटनेची माहिती मिळताच पोलीस अधीक्षक संदीप घुगे, अपर पोलीस अधीक्षक कल्पना बारवकर, तसेच वरिष्ठ पोलीस अधिकाऱ्यांनी घटनास्थळी भेट देऊन पाहणी केली. पंचनामा करण्यात आला असून, पुढील तपास सुरू आहे.
निवडणूक काळात घडलेली घटना
सांगली–मिरज–कुपवाड महापालिका निवडणुकीच्या पार्श्वभूमीवर शहरात कडक पोलीस बंदोबस्त असताना ही घटना घडल्याने नागरिकांमध्ये चिंता व्यक्त केली जात आहे. पोलिसांकडून परिस्थिती नियंत्रणात असल्याचे सांगण्यात आले असून, गुन्हेगारांना लवकरच अटक केली जाईल, असा विश्वास व्यक्त करण्यात आला आहे.
या प्रकरणी पुढील कायदेशीर प्रक्रिया सुरू असून, अधिकृत तपासानंतरच पुढील माहिती स्पष्ट होणार आहे.
- जतच्या पाणीटंचाईवरून सर्वपक्षीय आंदोलन; म्हैसाळचे आवर्तन, टँकरसह 7 मागण्यांसाठी रास्ता रोको
- सांगलीत दूध घेऊन घरी चाललेल्या महिलेच्या गंठणाला हिसका; अंधाराचा फायदा घेत चोरटा पसार
- मिरजेत एसटी वाहकाला वाचवताना पोलिसावर हल्ला; धारदार हत्याराने भोसकले
- Sangli Crime: विट्यात शिक्षिकांना अश्लील पत्रे पाठविल्याचा आरोप; कडेगावातील संशयिताला अटक
- पुण्यातून वृद्धाचे अपहरण, सांगलीत मारहाणीत मृत्यू; कॅनॉलमध्ये मृतदेह टाकल्याचा पोलिसांचा उलगडा
- Sangli Accident: रेणावी घाट अपघातातील मृतांच्या वारसांना प्रत्येकी ₹१० लाखांची मदत
