Sangli News | तासगाव : तासगाव तालुक्यातील ढवळी गावात विवाहाच्या नावाखाली फसवणुकीचा धक्कादायक प्रकार उघडकीस आला आहे. लग्नाच्या पहिल्याच रात्री नववधू घरातून पसार झाल्याने नवरदेवाची सुमारे अडीच लाख रुपयांची फसवणूक झाल्याचे स्पष्ट झाले असून, या प्रकरणी तासगाव पोलिस ठाण्यात पाच जणांविरोधात गुन्हा दाखल करण्यात आला आहे.
ढवळी येथील रहिवासी सोमनाथ अशोक चव्हाण (वय 35) यांनी या प्रकरणी तक्रार दाखल केली आहे. त्यानुसार, परभणी जिल्ह्यातील नांदगाव (पांढरी) परिसरातील काही व्यक्तींनी विवाह जुळवून देण्याच्या नावाखाली आर्थिक फसवणूक केल्याचा आरोप आहे.
फिर्यादीच्या माहितीनुसार, ऊसतोड मजूर आणण्यासाठी परभणी भागात गेलेल्या नातेवाईकांमार्फत ओळख झाल्यानंतर वधूचा फोटो दाखवण्यात आला. बोलणीनंतर विवाहास होकार देण्यात आला. मात्र, लग्नासाठी पाच लाख रुपयांची मागणी करण्यात आली. तडजोडीनंतर अडीच लाख रुपये देण्याचे ठरले आणि ही रक्कम रोख स्वरूपात वधूकडील व्यक्तींना देण्यात आली.
ठरल्याप्रमाणे 5 सप्टेंबर रोजी साध्या पद्धतीने विवाह सोहळा पार पडला. रीतीरिवाजानुसार नववधूला मंगळसूत्र, पैंजण व इतर सौभाग्य अलंकार देण्यात आले. लग्नानंतर वधूकडील नातेवाईक गावी परतले, तर नववधू आणि तिची पाठराखण करणारी एक महिला सासरी थांबल्या.
मात्र, मध्यरात्री बाथरूमला जाण्याच्या बहाण्याने दोघी घराबाहेर पडल्या आणि अंधाराचा फायदा घेत पसार झाल्या. सकाळपर्यंत शोध घेऊनही त्या न सापडल्याने विवाह फसवणूक झाल्याचे उघड झाले.
या प्रकरणी वधू, तिची आई, विवाह जुळवून देणारा मध्यस्थ, पाठराखण करणारी महिला आणि आणखी एका नातेवाईकाविरोधात फसवणूक व संबंधित कलमान्वये गुन्हा दाखल करण्यात आला असून, पोलीस पुढील तपास करत आहेत.
हेही वाचा: महायुतीतील जागावाटपावर आज तोडगा? राष्ट्रवादीची 30 तर शिंदेसेनेची 20 जागांची मागणी; आज सांगलीत निर्णायक बैठक.
- Sangli Civic : मतदार यादीत तुमचं नाव आहे का? मतदान कोणत्या बूथवर करायच — मोबाईलवरून 2 मिनिटांत शोधण्याची सोपी पद्धत
- NEET पेपरफुटीच्या निषेधार्थ ईश्वरपूरात विद्यार्थ्यांचा मोर्चा; दोषींवर कठोर कारवाईची मागणी
- सांगलीचे आमदार सुधीर गाडगीळ यांच्या मोटारीचा अपघात; दुचाकीस्वार जखमी
- कर्जमाफीसाठी मृत शेतकऱ्यांच्या वारसांनी तातडीने KYC पूर्ण करा; सांगली प्रशासनाचे आवाहन
- Sangli Jobs: मोफत ड्रोन पायलट प्रशिक्षणाची संधी; आर्थिकदृष्ट्या दुर्बल युवकांसाठी शासनाचा विशेष उपक्रम
- सांगली-सातारा विधान परिषदेत महायुतीचा दणदणीत विजय; धैर्यशील कदम 301 मतांनी विजयी
