Sangli Today | सांगली : राज्याचे दिवंगत माजी मुख्यमंत्री व ज्येष्ठ काँग्रेस नेते वसंतदादा पाटील यांच्या पत्नी शालिनीताई पाटील यांचे वृद्धापकाळाने निधन झाले. वयाच्या 94 व्या वर्षी त्यांनी मुंबईत राहत्या घरी अखेरचा श्वास घेतला. गेल्या काही काळापासून त्या आजारी होत्या.
शालिनीताई पाटील या मुंबईतील माहिम परिसरात वास्तव्यास होत्या. त्यांच्या निधनाची बातमी समजताच राज्याच्या राजकीय व सामाजिक वर्तुळातून शोक व्यक्त केला जात आहे. त्यांच्यावर सातारा जिल्ह्यातील कोरेगाव तालुक्यातील मूळ गावी अंत्यसंस्कार करण्यात येणार आहेत.
राजकीय व सामाजिक क्षेत्रात सक्रिय भूमिका
शालिनीताई पाटील या केवळ वसंतदादा पाटील यांच्या पत्नी म्हणून नव्हे, तर स्वतंत्र राजकीय ओळख असलेले नेतृत्व म्हणून ओळखल्या जात होत्या. पतीच्या राजकीय वाटचालीत त्यांनी खंबीर साथ दिली, तसेच स्वतःही सक्रिय राजकारणात सहभाग घेतला.
१९८० च्या दशकात त्यांनी काँग्रेस सरकारमध्ये मंत्रिपदाची जबाबदारी सांभाळली होती. १९८१ मध्ये तत्कालीन मुख्यमंत्री ए. आर. अंतुले यांच्या राजीनाम्यास कारणीभूत ठरलेल्या घडामोडींमध्ये त्यांची महत्त्वाची भूमिका मानली जाते.
लोकप्रतिनिधी म्हणूनही काम
शालिनीताई पाटील यांनी सांगली लोकसभा मतदारसंघाचे प्रतिनिधित्व केले होते. त्यानंतर सातारा जिल्ह्यातील कोरेगाव विधानसभा मतदारसंघातून १९९९ ते २००९ या कालावधीत त्या आमदार म्हणून निवडून आल्या होत्या. यापूर्वी त्यांनी जनता दल व अपक्ष म्हणूनही निवडणूक लढवली होती.
सर्व स्तरांतून शोक
त्यांच्या निधनामुळे काँग्रेस पक्षासह महाराष्ट्राच्या राजकारणातील एक ज्येष्ठ व्यक्तिमत्त्व काळाच्या पडद्याआड गेले आहे. अनेक राजकीय नेते, सामाजिक कार्यकर्ते आणि मान्यवरांनी शालिनीताई पाटील यांना श्रद्धांजली वाहिली आहे.
हेही वाचा: मोटारसायकल चोरीप्रकरणी सराईत चोरट्यास अटक; 3 लाखांहून अधिक किमतीच्या 5 दुचाकी जप्त.
- Sangli Civic : मतदार यादीत तुमचं नाव आहे का? मतदान कोणत्या बूथवर करायच — मोबाईलवरून 2 मिनिटांत शोधण्याची सोपी पद्धत
- NEET पेपरफुटीच्या निषेधार्थ ईश्वरपूरात विद्यार्थ्यांचा मोर्चा; दोषींवर कठोर कारवाईची मागणी
- सांगलीचे आमदार सुधीर गाडगीळ यांच्या मोटारीचा अपघात; दुचाकीस्वार जखमी
- कर्जमाफीसाठी मृत शेतकऱ्यांच्या वारसांनी तातडीने KYC पूर्ण करा; सांगली प्रशासनाचे आवाहन
- Sangli Jobs: मोफत ड्रोन पायलट प्रशिक्षणाची संधी; आर्थिकदृष्ट्या दुर्बल युवकांसाठी शासनाचा विशेष उपक्रम
- सांगली-सातारा विधान परिषदेत महायुतीचा दणदणीत विजय; धैर्यशील कदम 301 मतांनी विजयी
