सांगली : जवळपास दोन दशकांनंतर सांगलीत महाराष्ट्र राज्य कला प्रदर्शनाचे आयोजन झाल्याने जिल्ह्यातील कलाप्रेमींसाठी मोठी संधी उपलब्ध झाली आहे. ६५ वे महाराष्ट्र राज्य कला प्रदर्शन कलाविश्व महाविद्यालय, शांतिनिकेतन येथे सुरू झाले असून २२ फेब्रुवारीपर्यंत सर्वांसाठी विनामूल्य खुले राहणार आहे.
यंदा राज्यभरातील ३,४९० विद्यार्थ्यांकडून तब्बल ५,६८० कलाकृती प्राप्त झाल्या. त्यापैकी १,२७५ उत्कृष्ट कलाकृतींची अंतिम निवड करून त्यांची प्रदर्शनात मांडणी करण्यात आली आहे. त्यामुळे एकाची ठिकाणी राज्यभरातील नवोदित कलाकारांची विविध शैली, विषय आणि प्रयोग पाहण्याची संधी नागरिकांना मिळत आहे.
रेखा व रंगकला, शिल्पकला, उपयोजित कला, मुद्राचित्रण, कला शिक्षक प्रशिक्षण, कला व हस्तव्यवसाय, मूलभूत अभ्यासक्रम आणि दिव्यांग विभाग अशा आठ विभागांमध्ये दालने सजविण्यात आली आहेत. प्रत्येक विभागातून उत्कृष्ट कलाकृतींना पारितोषिके दिली जाणार आहेत.
यंदा प्रथमच शासकीय रेखाकला परीक्षेतील गुणवत्ता यादीतील विद्यार्थी आणि बालचित्रकला स्पर्धेतील राज्यस्तरीय विजेत्यांचाही गौरव करण्यात येणार आहे, ही या प्रदर्शनाची विशेष बाब आहे.
प्रदर्शनाचे उद्घाटन उच्च व तंत्र शिक्षण मंत्री चंद्रकांत पाटील यांच्या हस्ते झाले. ज्येष्ठ कलावंत जी. एस. माजगावकर यांचा यावेळी विशेष सन्मान करण्यात आला.
सकाळी ११ ते सायंकाळी ७ या वेळेत प्रदर्शन खुले राहणार असून, विद्यार्थी, पालक आणि कलारसिकांनी या संधीचा लाभ घ्यावा, असे आवाहन आयोजकांनी केले आहे.
हेही वाचा: सांगली जि.प. सत्तास्थापनेचा निर्णय मुंबईत; अध्यक्षपदासाठी अजित पवार गटाचा आग्रह, महायुतीसमोर नवा पेच.
- सांगलीत युवा पिढीला तंबाखूपासून दूर राहण्याचे आवाहन; 2025-26 या वर्षात एकूण 2361 जणांचे समुपदेशन
- सांगली जिल्ह्यात 16 मेपासून जनगणना 2027 चा पहिला टप्पा सुरू; 4,421 प्रगणक घराघरात जाऊन डिजिटल घरगणना करणार
- कवठेमहांकाळ शासकीय वसतिगृहात मोफत प्रवेश सुरू; 8 वी ते पदवी विद्यार्थ्यांना मोठी संधी
- बिरोबा देवस्थान पर्यटन विकासासाठी ₹149 कोटींच्या आराखड्यास मंजुरी
- संखमध्ये महावितरण कर्मचाऱ्याचा गोळ्या झाडून खून; तीन तासांत दोघांना अटक
- मिरजमध्ये 17 एप्रिलला विशेष सरकारी शिबीर; सर्व शासकीय सेवा एकाच ठिकाणी
