मिरज : मिरज–पंढरपूर राष्ट्रीय महामार्गावर नागज फाट्याजवळ शुक्रवारी मध्यरात्री एक गंभीर प्रकार घडल्याचा आरोप शेतकऱ्यांकडून करण्यात आला आहे. RTO अधिकारी असल्याचे भासवून एका स्कॉर्पिओ वाहनातून आलेल्या व्यक्तींनी धान्याची वाहतूक करणाऱ्या शेतकऱ्यांना जबरदस्तीने अडवून कांद्याची पोती उचलल्याचा आरोप करण्यात आला आहे.
मिळालेल्या माहितीनुसार, बार्शी तालुक्यातील काही शेतकरी आपली कांद्याची वाहतूक बेळगावकडे करत असताना रात्री सुमारे २ वाजता नागज फाट्याजवळ त्यांची गाडी अडवण्यात आली. स्कॉर्पिओ वाहनातील व्यक्तींनी आपण RTO अधिकारी असल्याचे सांगत वाहनाची कागदपत्रे तपासली. शेतकऱ्यांच्या म्हणण्यानुसार, सर्व कागदपत्रे व्यवस्थित असूनही “ट्रकमधील पाच कांद्याची पोती द्या, अन्यथा गाडी पोलीस ठाण्यात जमा करू” अशी धमकी देण्यात आली.
या घटनेत संबंधित व्यक्तींनी कांद्याची पोती आपल्या खासगी स्कॉर्पिओ वाहनात टाकून तेथून निघून गेल्याचा आरोप शेतकऱ्यांनी केला आहे. संबंधित स्कॉर्पिओ वाहनाच्या मागील बाजूस ‘पोलीस’ असे लिहिलेले असल्याचेही शेतकऱ्यांकडून सांगण्यात आले आहे.
दरम्यान, या प्रकरणाची सखोल चौकशी करण्यात यावी, अशी मागणी राष्ट्रवादी काँग्रेस पार्टीचे जिल्हा सरचिटणीस नागेश चव्हाण यांनी केली आहे. महामार्गावर अशा प्रकारे अधिकारी असल्याचे भासवून शेतकऱ्यांची पिळवणूक होत असल्यास ती गंभीर बाब असून संबंधित व्यक्तींवर कठोर कारवाई व्हावी, असे त्यांनी म्हटले आहे.
या घटनेप्रकरणी अद्याप पोलीस किंवा प्रशासनाकडून अधिकृत प्रतिक्रिया समोर आलेली नाही. मात्र, शेतकरी संघटनांकडून या प्रकाराबाबत तीव्र संताप व्यक्त केला जात असून, महामार्गावरील सुरक्षेचा मुद्दा पुन्हा ऐरणीवर आला आहे.
- Sangli Civic : मतदार यादीत तुमचं नाव आहे का? मतदान कोणत्या बूथवर करायच — मोबाईलवरून 2 मिनिटांत शोधण्याची सोपी पद्धत
- NEET पेपरफुटीच्या निषेधार्थ ईश्वरपूरात विद्यार्थ्यांचा मोर्चा; दोषींवर कठोर कारवाईची मागणी
- सांगलीचे आमदार सुधीर गाडगीळ यांच्या मोटारीचा अपघात; दुचाकीस्वार जखमी
- कर्जमाफीसाठी मृत शेतकऱ्यांच्या वारसांनी तातडीने KYC पूर्ण करा; सांगली प्रशासनाचे आवाहन
- Sangli Jobs: मोफत ड्रोन पायलट प्रशिक्षणाची संधी; आर्थिकदृष्ट्या दुर्बल युवकांसाठी शासनाचा विशेष उपक्रम
- सांगली-सातारा विधान परिषदेत महायुतीचा दणदणीत विजय; धैर्यशील कदम 301 मतांनी विजयी
