Sangli Sankh Solar Project | सांगली : सांगली जिल्ह्यातील संख (ता. जत) येथे तब्बल २०० हेक्टर क्षेत्रावर हजार कोटी रुपये खर्च करून सौरऊर्जा प्रकल्प उभारला जाणार आहे. या प्रकल्पामुळे म्हैसाळ उपसा सिंचन योजना पूर्णपणे सौरऊर्जेवर चालवली जाणार असून, नोव्हेंबरमध्ये या प्रकल्पासाठी निविदा प्रक्रियेचा मार्ग मोकळा झाला आहे.
टेंभू, ताकारी आणि म्हैसाळ उपसा सिंचन योजनांचा सर्वात मोठा खर्च विजेच्या बिलावर आहे. वारंवार थकीत बिलामुळे योजना बंद ठेवावी लागल्याच्या घटना घडल्या आहेत. या पार्श्वभूमीवर पाटबंधारे विभागाने सिंचन योजना सौरऊर्जेवर चालवण्याचा निर्णय घेतला आहे. त्याचाच एक भाग म्हणून संख येथे हा भव्य प्रकल्प उभारला जाणार आहे.
या प्रकल्पात २०० मेगावॉट क्षमतेची वीज निर्मिती होणार असून, म्हैसाळ योजनेसाठी लागणारे ९६ मेगावॉट वीजेचे संपूर्ण समाधान होणार आहे. पाणी आवर्तनाशिवाय अन्य काळात तयार होणारी वीज महावितरणला विकून अतिरिक्त उत्पन्नही मिळणार आहे.
सौरऊर्जा प्रकल्पाचे काम २०२६ च्या सुरुवातीस सुरू होण्याची शक्यता असून, २०२८ च्या जून महिन्यापर्यंत हा प्रकल्प कार्यान्वित होईल, असा अंदाज आहे. हा प्रकल्प सुरु झाल्यानंतर शेतकऱ्यांच्या पाणीपट्टीतही सवलत मिळण्याची शक्यता वर्तवली जात आहे.
या प्रकल्पासाठी केंद्र सरकार, राज्य सरकार आणि जर्मन बँकेचा निधी उपलब्ध झाला असून, कृष्णा खोरे महामंडळामार्फत प्रकल्प राबवला जाणार आहे.
हेही वाचा : बिटकॉईन मधून नफा मिळवून देण्याचे आमिष, आईचे पाच तोळ्याचे गंठण गहाण ठेवले.
📍 तालुक्यातील आणखी बातम्या 📍
