पेठनाका (ता. वाळवा) – होळीच्या सणाच्या रात्री पेठनाक्याजवळ पुणे–बेंगलोर महामार्गावर भरधाव कारच्या धडकेत 55 वर्षीय वेटरचा मृत्यू झाल्याची घटना घडली. धडक दिल्यानंतर पांढऱ्या रंगाची चारचाकी कार घटनास्थळी न थांबता पुण्याच्या दिशेने सुसाट निघून गेली.
चंद्रकांत शिवाप्पा पांचाळ (वय 55, रा. पेठनाका) असे मृत व्यक्तीचे नाव आहे. ते येडेनिपाणी येथे एका हॉटेलमध्ये वेटर म्हणून काम करत होते. होळीचा सण असल्याने सोमवारी (दि. 2 मार्च) रात्री सुमारे 8.15 वाजण्याच्या सुमारास ते कामावरून घरी परतत होते.
त्यावेळी पुणे–बेंगलोर महामार्गावर, हॉटेल मणिकंडनसमोर अचानक अपघाताचा मोठा आवाज झाला. आवाज ऐकून परिसरातील नागरिक घटनास्थळी धावले. पांचाळ यांचे घरही तेथेच असल्याने त्यांच्या पत्नीही घटनास्थळी पोहोचल्या. रस्त्यावर गंभीर जखमी अवस्थेत पडलेली व्यक्ती आपले पतीच असल्याचे त्यांनी ओळखले. त्यांच्या डोक्याला तसेच हाता-पायांना गंभीर दुखापत झाली होती.
स्थानिकांच्या मदतीने जखमी अवस्थेत पांचाळ यांना तातडीने उपजिल्हा रुग्णालय, ईश्वरपूर येथे हलविण्यात आले; मात्र डॉक्टरांनी तपासणीअंती त्यांना मृत घोषित केले.
पांढऱ्या रंगाच्या अज्ञात कारचालकाविरुद्ध इस्लामपूर पोलीस ठाण्यात गुन्हा नोंदवण्यात आला असून संबंधित वाहनाचा शोध घेण्यासाठी पोलिसांनी तपास सुरू केला आहे.
चंद्रकांत पांचाळ यांच्या पश्चात पत्नी, 15 वर्षांची मुलगी आणि 8 वर्षांचा मुलगा असा परिवार आहे. कुटुंबाचा प्रमुख कमावता गमावल्याने घरावर दुःखाचा डोंगर कोसळला आहे. सणाच्या दिवशीच घडलेल्या या घटनेमुळे परिसरात हळहळ व्यक्त होत आहे.
येथे वाचा : सांगली अपघात बातम्या.
- Sangli Civic : मतदार यादीत तुमचं नाव आहे का? मतदान कोणत्या बूथवर करायच — मोबाईलवरून 2 मिनिटांत शोधण्याची सोपी पद्धत
- NEET पेपरफुटीच्या निषेधार्थ ईश्वरपूरात विद्यार्थ्यांचा मोर्चा; दोषींवर कठोर कारवाईची मागणी
- सांगलीचे आमदार सुधीर गाडगीळ यांच्या मोटारीचा अपघात; दुचाकीस्वार जखमी
- कर्जमाफीसाठी मृत शेतकऱ्यांच्या वारसांनी तातडीने KYC पूर्ण करा; सांगली प्रशासनाचे आवाहन
- Sangli Jobs: मोफत ड्रोन पायलट प्रशिक्षणाची संधी; आर्थिकदृष्ट्या दुर्बल युवकांसाठी शासनाचा विशेष उपक्रम
- सांगली-सातारा विधान परिषदेत महायुतीचा दणदणीत विजय; धैर्यशील कदम 301 मतांनी विजयी
