सांगली (सांगली टुडे वृत्तसेवा): राज्यातील आर्थिकदृष्ट्या दुर्बल आणि निराधार ज्येष्ठ नागरिकांना उतारवयात कोणावरही अवलंबून राहावे लागू नये आणि त्यांना सन्मानाने जगता यावे, यासाठी महाराष्ट्र शासनाकडून ‘श्रावणबाळ सेवा राज्य निवृत्तीवेतन योजना’ राबवली जात आहे. या योजनेअंतर्गत पात्र ज्येष्ठ नागरिकांना शासनाकडून दरमहा १,५०० रुपयांचे नियमित आर्थिक सहाय्य (निवृत्तीवेतन) थेट त्यांच्या बँक खात्यात दिले जाते.
महाराष्ट्र शासनाच्या ‘आपले सरकार’ विभागाकडून या योजनेच्या प्रमुख अटी आणि लाभाची माहिती पुन्हा एकदा नागरिकांसाठी जारी करण्यात आली आहे. ग्रामीण आणि शहरी भागातील गरजू वृद्ध नागरिकांना दैनंदिन गरजा आणि औषधोपचारांसाठी नियमित मासिक आर्थिक आधार मिळावा, हा या योजनेमागील मुख्य उद्देश आहे.
योजनेचे प्रमुख नियम आणि पात्रता अटी
- मासिक लाभ: पात्र लाभार्थी ज्येष्ठ नागरिकांना दरमहा १,५०० रुपये निवृत्तीवेतन दिले जाते.
- वयोमर्यादा: अर्जदार नागरिकाचे वय ६५ वर्षे किंवा त्याहून अधिक असणे आवश्यक आहे.
- वार्षिक उत्पन्न मर्यादा: अर्जदाराच्या कुटुंबाचे एकत्रित वार्षिक उत्पन्न २१,००० रुपयांपर्यंत (किंवा शासन निर्णयानुसार बीपीएल यादीत समाविष्ट) असणे बंधनकारक आहे.
- रहिवासी अट: अर्जदार हा महाराष्ट्र राज्याचा कायमस्वरूपी रहिवासी असावा.
अर्ज कोठे आणि कसा करावा?
महाराष्ट्र शासनाच्या ‘श्रावणबाळ सेवा राज्य निवृत्तीवेतन योजने’साठी पात्र नागरिक ऑफलाईन तसेच ऑनलाईन अशा दोन्ही पद्धतींनी अर्ज करू शकतात:
- ऑफलाईन पद्धत: अर्जदार आपल्या तालुक्याच्या तहसीलदार कार्यालयातील (संजय गांधी निराधार अनुदान योजना शाखा), तालुक्यातील सेतू केंद्र / नागरिक सुविधा केंद्र, गावातील तलाठी कार्यालय किंवा जिल्हाधिकारी कार्यालयातील संबंधित विभागाकडे आवश्यक कागदपत्रांसह अर्ज सादर करू शकतात.
- ऑनलाईन पद्धत: घरबसल्या अर्ज करण्यासाठी राज्य शासनाच्या ‘आपल सरकार’ (Aaple Sarkar) पोर्टलवर किंवा सामाजिक न्याय व विशेष सहाय्य विभागाच्या अधिकृत संकेतस्थळावर जाऊन ऑनलाईन अर्ज भरता येतो.
हेही वाचा: आता एजंटशिवाय घरबसल्या काढा ड्रायव्हिंग लायसन्स; ‘आपले सरकार’ने जाहीर केले अधिकृत दर आणि कागदपत्रांची यादी.
अर्जासोबत लागणारी आवश्यक कागदपत्रे
अर्ज सादर करताना आधार कार्ड, वयाचा दाखला (वय ६५ वर्षे किंवा त्याहून अधिक असल्याचा पुरावा), २१,००० रुपये किंवा त्यापेक्षा कमी वार्षिक उत्पन्नाचा दाखला (किंवा BPL कार्ड), महाराष्ट्राचा १५ वर्षांचा रहिवासी दाखला (डोमिसाईल प्रमाणपत्र), डीबीटीसाठी (DBT) बँकेच्या पासबुकची प्रत आणि पासपोर्ट आकाराचा फोटो जोडणे आवश्यक आहे. अर्जाची छाननी पूर्ण झाल्यानंतर पात्र लाभार्थ्यांच्या बँक खात्यात दरमहा १,५०० रुपये जमा होण्यास सुरुवात होते.
सांगली, मिरज, कुपवाडसह जिल्ह्यातील सर्व तालुक्यांतील पात्र ज्येष्ठ नागरिकांनी या योजनेचा लाभ घेण्यासाठी तात्काळ अर्ज करावा, असे आवाहन जिल्हा प्रशासनाच्या वतीने करण्यात येत आहे.



